五斗米 South Taiwan Comfort：再遇仙草凍

早晌舊年曾到訪過位處堅離地城主打賣台南牛肉麵嘅「五斗米」，靜悄悄已經晌上環開咗家分店，原來仲已開業近半年添。是夜得一支公，就過再嚐吓地道嘅台式牛肉麵。

跟西環店明顯唔同，上環店喺主要做外賣為主，所以，鋪面十分簡單，內裡就只有兩個堂食座位。

而且，從櫃枱前面掛住「戶戶送」嘅紙袋，以及一個接一個嘅外送訂單，就知有唔少捧場客。

睇見張落單紙，比起之前晌西環店所見嘅，就選項多咗，不過，嚟嚟去去主要都喺主食、小食、台式滷水、湯及各款飲品。因為一心想嚟食番碗牛肉麵，所以，其他嘢就無再點考慮，配多杯珍珠奶茶。

原汁牛肉刀削麵 $65

依家多咗刀削麵選擇，就梗喺要試試啦，咪睇佢好好細細碗，其實都好墜手，內裡塞滿麵條，牛肉亦鋪滿碗面。啲牛肉質感極為鬆化，甚富肉香，麵條不規則嘅外形，就知喺人手製，咬落好有韌性，而湯頭濃郁鮮香，再帶點甜味，可以講喺啖啖精華，小弟飲咗大半碗，都唔覺有咩油膩。

珍珠奶茶 $23

上次都無試佢嘅珍珠奶茶，所以，今次就試吓先。奶茶都喺預先製作雪好，倒出嚟加珍珠便是。奶茶茶底都算幾香，口感唔錯，啲珍珠頗有咬口，而且，份量幾多，好似啜極都有咁，可惜佢哋喺用紙杯，如果用膠杯就睇得出有幾多珍珠底。

除咗食物選項多咗之外，另一唔同就喺多埋甜品供應，晌門口嘅廣告牌就已經有留意到佢哋賣埋台底甜點，如愛玉、麻糬、仙草……等等。見今日狀態好，就一於食多碗甜品捧住個肚返屋企。

黑糖仙草奶凍 $28

早前晌荃灣嘅「叁茶陸飯」食過一客「黑糖芋圓仙草凍」 ，今晚又可以重溫黑糖搭仙草嘅美味。奉上嘅黑糖仙草奶凍一樣填到滿滿咁大碗，黑糖、芋圓、仙草、珍珠，撈埋溝勻，一大羹放入口，口感多層次，煙韌嘅芋圓、滑溜嘅仙草、QQ嘅珍珠，浸潤晌清甜天然嘅黑糖，喺美妙嘅配搭。

再訪「五斗米」，雖然喺做外帶嘅分店，但水準保持到上次晌總店嘅質素，而且，加入喜愛嘅黑糖仙草，雖然只喺一碗麵、一杯嘢飲、一份甜點，但已令小弟今晚食得更盡興。

個人評分
味道：8/10
環境：5/10
服務：7/10
抵食：8/10
平均每人消費：HK$116

餐廳資料：
五斗米 South Taiwan Comfort
上環皇后大道中237號太興中心1座地舖
3707 0824