叁茶陸飯 CHA FAN：茶飯不C

一個月前過嚟Ikea買嘢，路經呢個餐廳時，就好奇佢個名點解，三姑六婆、三頭六臂、三書六禮、三推六問、三宮六院、三口六面……我就識，「叁茶陸飯」究竟開邊瓣！？其實，上次經過時已睇過吓，主打喺賣台灣菜，剛剛去完旅行，有啲手信跟表姨甥女交收，所以，就索性約佢食餐簡約便飯。

從門面所見，台式小吃、熱炒及手搖茶喺佢哋嘅主力。

從外觀睇，都見餐廳地方非常大，觀感開揚光猛，全店裝修更以木系為主軸，襯以粉藍，摩登得嚟又有少少文青感，又有啲少女味道。雖然樓底高，但要挑剔喺地方大就大喇，但枱櫈編排有些微擠迫，簡直枱與枱連成一線。

枱上已放自助水樽，唔使煩到侍應添水，小弟都幾鍾意呢個做法。我見有啲人寫食評話張枱好細，講到連樽水都要放晌地上，又唔喺吖，我哋上齊晒嘢都無問題（甜品後上除外）。

菜式就印晒晌點菜紙之上，分類為小食、湯品、豬牛雞海鮮類菜式、蔬菜、台式麵飯、多款台茶、台式特飲及甜品，溫提：需收加一服務費。

此外，餐枱墊嘅一角印有廚師推介，唔想諗、唔想煩嘅客人，大可以就咁晌度揀幾款。

滷味拼盤（小）$58

其實台式滷水一向有市場，我哋都鍾意食滷水嘢，一客細拼盤有齊雞翼、牛肚、豆乾、滷蛋、花生，啱晒多心想樣樣都試吓嘅人。整體嚟講，都幾入味，個滷水芳香而唔會有過鹹嘅情況，伴飯一流，所以，點咗一客白飯（$11）。牛肚滷得夠晒軟腍，豆乾屬台式較硬嗰種，但幾有豆香， 喺滷蛋硬實咗啲。

主廚紅燒牛肉麵 $68

同食碗日式拉麵差唔多價錢，梗喺要嗒真啲個湯啦，個湯底非常香濃，可謂濃而不濁，有一份醇厚嘅感覺。麵條食落頗有咬口，而啲紅燒牛肉口感十分鬆化，夠肉香，認真唔錯。

招牌黑糖珍珠炭燒烏龍奶茶 $28
飲品就梗喺揀啲特別少少啦，不過，佢哋啲台式飲品其實都幾吸引。個烏龍茶底比預期幽香，配以黑糖，感覺醇和啲，珍珠煙韌，唔喺啲劣質貨色。

海鹽芝士奶蓋茉香綠茶 $26

上之晌Say Cheese試過一次芝士奶蓋飲品，今次就想再回味一下，先啜兩啖芝士奶蓋，鹹香豐厚，再嘆兩啖茉香綠茶，確喺芳香，再攪勻試試，所產生嘅化學作用無上次試到嘅咁突出，但已相當不錯。

黑糖芋圓仙草凍3號 $38

黑糖、芋圓、仙草幾樣台式甜品食材嘅主力拼埋一齊，原來內裡仲有埋燕麥、紅豆、珍珠，大大碗嘅仙草凍，份量十足，啱晒「些牙」喇。煙韌嘅芋圓、爽滑嘅仙草、咬口嘅燕麥、清甜嘅紅豆、QQ嘅珍珠，超足料，口感豐富，淌晌黑糖糖水底，真喺無得點輸囉。

寶島雖然唔常去，但本身都幾鍾意台式食品及飲品，因為，覺得佢哋好有一種個人風格。事後再晌網上搵搵，原來「叁茶陸飯」意指比喻招待客人非常周到，是次嘅用餐，雖然未叫得做「非常」，但都算有禮周到，整體打分可以俾個B佢。

個人評分
味道：7/10
環境：7/10
服務：8/10
抵食：8/10
平均每人消費：HK$126

餐廳資料：
叁茶陸飯 CHA FAN
荃灣青山公路388號中國染廠大廈中染新城1樓117號舖
2350 1638