Vida Coffee Stand：隱店賞心咖啡

相熟嘅食友早前試過依間咖啡店，覺得質素相當高，知我喜歡嘆吓咖啡，又晌中環區工作，所以，推薦小弟嚟試一試。小店位處皇9嘅嘉軒廣場，其實，正正晌小弟做嘢斜對面，一於早少少過嚟當食個早餐。

除咗Starbucks、Pacific Coffee等連鎖大鋪，中環幾個大商場都有依一類小型咖啡店，鋪位細細，專做外賣，明顯喺專做樓上寫字樓客，但亦設有少量企位供立食。全店以湖水藍襯白色雲石，顯得典雅清新。

咪睇佢鋪位細細，正所謂麻雀雖小，五臟俱全，提供多款飲品。除慣常所見嘅意大利濃縮咖啡系列，仲有唔少單品咖啡，期間亦見唔少知音人嚟嘆杯單品咖啡，此外，仲有少少非咖啡嘅飲品。

雖然嘉軒呢個商場一向俾人感覺都喺靜，不過，嚟幫襯飲杯咖啡嘅人可不少。見師傅一個人一腳踢，忙而不慌，應付自如。

食品方面，選擇唔多，就喺晌另一邊櫃枱一眼睇晒，有法式酥餅及英式鬆餅，均以玻璃罩冚實，衞生功夫做足。不過，以小店嘅格局，依等輕食應該都喺來貨多。

鮮奶咖啡一向喺我嘅不二首選，落單時，仲可以俾客人揀豆，一款喺果香味重啲，另一款就果仁味重啲，我就揀咗後者嚟沖泡我杯咖啡。

Caffe Latte $40

湖水藍嘅茶杯，貫徹番咖啡店嘅「色通」，雖然咖啡喺要講質素，但飲鮮奶咖啡，就總期望欣賞到靚嘅拉花，師傅拉花嘅手勢好得，咖啡面無多餘嘅泡泡，多重嘅心形拉花均勻對稱，線紋細緻，心形收尾嘅尖位啱啱好對正六點位，拉得屬完美嘅作品。入口口感及味道好平均，順滑、醇香，的確有點果仁香氣，而咖啡味唔會時重時輕，非常均勻。

Pain Au Chocolat $25

包點中，法式嘅酥皮類一向甚受大眾歡迎，無論鹹甜，小弟都鍾意。朱古力酥皮包，外形四四方方，外皮金黃，似乎焗得唔錯。咬一口，包身都挺鬆軟，但睇佢嘅酥皮層次唔算好清晰，內層嘅朱古力漿唔算多，但勝在香濃，整體算喺唔錯。

見佢哋櫃枱面有啲包裝精美嘅咖啡豆，嚟自埃塞俄比亞、哥倫比亞、肯亞及哥斯達黎加，都喺出產靚豆嘅國家之一，一睇就知喺作零售散賣，可以通知麵包班同學仔嚟幫襯吓。

正所謂一日之計在於晨，亦聽唔少人講三餐中早餐應該要食得豐富啲，不過，簡簡單單，一杯賞心嘅咖啡，啱口味嘅麵包，已經可以好好咁叉足電。

個人評分
味道：8/10
環境：7/10
服務：8/10
抵食：7/10
平均每人消費：HK$65

餐廳資料：
Vida Coffee Stand
中環皇后大道中9號嘉軒廣場2樓220-1號舖