山區裡的走走趯趯: 金滿都越南餐廳 Gold Mondo Vietnamese Restaurant：分金同味

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2017年7月18日星期二

金滿都越南餐廳 Gold Mondo Vietnamese Restaurant：分金同味

上次去長沙灣「DK Pizza」時，已途經過見依間「金滿都」越式餐廳，其實本身都幾鍾意東南亞菜式，因為味道上幾有特色，而越南菜故然亦有佢嘅個性。原來，依間餐廳喺家住順寧道尾表姨甥女嘅飯堂之一，佢話呢道啲晚餐四、五十，去茶記或快餐店都要呢個價啦，但勝在地方好坐，乾淨企理。

講真，相對周圍幾間餐廳，呢度的確光猛整潔，有別一般茶記，雖然裝潢無咩特別，完全睇唔出佢喺一家賣越南菜嘅餐廳，但食嘢最緊要好食之餘，就喺坐得舒服啫。人客一走，就見啲店員立刻清理，感覺管理不俗。

翻一轉餐牌，食物款式多得不容小覷，有甜品、越式小食、越式湯河粉、湯檬、撈檬、越式飯品、小菜、廚師推介、飲品（但奇怪嘅喺有即磨咖啡，但就無越式滴漏咖啡）……等等。

更抵食划算嘅，就應該數到晚餐，不過，我見佢嘅晚餐喺標明「星期二晚餐」，相信唔同日子嚟個晚餐都有少少變化。晚餐仲有好多加配優惠，包餐飲，亦可以補錢轉其他款式。

另有啲是日優惠，姑勿論喺唔喺啲宣傳技倆，但睇落啲價錢都好抵食。

此外，唔少得梗喺仲有套餐啦，有二人精選晚餐（$198 / $268）及四人精選晚餐（$468），都喺抵食之選。結果揀咗貴少許嘅二人晚餐嚟分甘同味，貪佢有得試越底大頭蝦，不過，啱啱無晒個牛柳粒紅飯，但店方好識變通，俾我哋揀一款湯河之外，補多一客香茅豬扒拼雞翼，真喺除笨有精。以下所標示嘅價錢，喺散點單價，當喺俾大家有個參考。

三色拼盤 $55

拼盤有蔗蝦、春卷、粉包，每款都有兩件，安心分享唔使爭，配備魚露及甜酸醬。啲蔗蝦唔喺好多肉，蝦味OK啦，但打得彈牙，而春卷入口唔油，好酥脆，至於越式粉包外皮既薄且滑，裡面填滿肉碎、菌粒、甘筍粒，味道唔錯喎，沾啲魚露感覺就鮮。

香茅豬扒拼雞翼 $52

豬扒炸得十分金黃，並切成一件件方便食用，一口咬落去，鬆化得嚟好有爆汁嘅感覺，而且，又唔油，加上香茅味十足；而雞翼亦好滋味，外皮極之香脆，內裡雞肉非常嫩滑，不過，香茅味就唔及豬扒重。

越式香草焗大頭蝦 $148

大頭蝦喺今晚最期待嘅菜式，亦喺個晚餐嘅重頭戲，大頭蝦開邊淋上蒜蓉牛油烤焗，焗到金黃香噴噴，睇見都流口水。雖然無註明喺幾多頭大嘅越南大頭蝦，但都好夠大隻，撥開啲醬，蝦頭非常多膏，甘腴滋味；以刀叉輕易刮起啲蝦肉，大大啖，口感爽彈，好有蝦鮮味，正呀！

不過，啲蝦腳好多刺，幾難拆肉，不過，拆出嚟嘅蝦肉比較乾，食味麻麻，都可以慳番啲心機拆蝦腳。

清湯浸時菜 $20

是日嘅時菜喺白菜仔，話明喺清湯當然就唔會好濃，但亦唔會淡而無味，面面放啲炸蒜片，食起嚟啲菜無過腍，有啲清湯帶出嘅鹹鮮味，有碟菜就但求餐飯食得平衡啲。

越南生熟牛肉湯河 $45

友人唔敢食得太生，就揀生熟牛肉湯河，先講個湯，同個時菜嘅清湯就有天壤之別喇，湯底香而不俗，的確幾有骨香且馥郁，果然有料到；河粉較廣東嘅幼身少少，但好滑溜，而且份量頗多，我哋兩個人以碗仔分嚟食，都分到足4碗；至於啲牛肉，有生牛肉及牛腩片，前者質感嫩滑，後者就肉味重啲，仲伴有少少入口無渣嘅蘿蔔，整體個牛河喺幾有水準。