餐廳位於加州大廈，地佔全層，環境非常之大，一室以金黃為主調，摩登時尚，貴氣得嚟唔俗，加上樓底高，枱櫈編排闊落，故感覺十分寬敞。
是次雖然喺由老友發辧，但慣常都會影低餐牌，俾自己留記錄之餘，等大家當個參考，睇睇有啱咩食。概略嚟講，菜式嘅選擇非常多，第一版就有築地直送海鮮料理及俺の精選，其他仲包括俺の推介、佐酒料理、冷菜、刺身、天婦羅、宮崎和牛料理、燒物、溫菜、食事和甘味。
除主餐牌外，並有個喺分散出嚟，可以講喺佐酒餐牌，因為有佐酒小食外，仲有啲配酒嘅組合。
而講到酒，老實講，小弟酒量真喺麻麻哋，亦唔多好酒，不過，呢度真喺好多日本酒供應，多款知名大吟釀、清酒、燒酎、果酒，仲有紅白餐酒、烈酒、雞尾酒……等等，想知有啲咩就自己睇睇。
友人想試試佢啲雞尾酒，就點啲嚟試，小弟就揀無乜酒精嘅嚟試。
Kiss of the Night $88
講明對酒唔認識，都喺照抄，以Sakura Liqueur、Vodka、Cointreau及Lemon Juice溝成，君度橙酒令杯嘢泛出淡淡橙色，友人話入口酒精度幾勁吓，加入伏特加果然唔喺嘢少。
Yuki no Hana $88
另一杯以高身雞尾酒杯盛載嘅喺以Yuzushu、Shochu、Lime Juice及Grenadine溝成，混入燒酌，同樣酒精度唔低，但加入日本柚子酒、青檸汁及石榴糖漿，味道順口唔會太霸道。
Midori no Akuma $88
小弟呢杯就絕對啱唔飲酒嘅朋友，睇成份都只喺Peppermint Green、Pineapple Juice及Lemon Juice，望落清爽，入口清新。
如果講到佐酒，晌主餐牌嘅佐酒料理之外，不得不介紹其日式串燒，尤其飲啤酒嘅朋友就更啱，共14款，有平有貴，都喺餸酒良伴。
牛舌 $48
啲串燒有唔同嘅做法，而牛舌可以揀鹽燒或汁燒，牛脷嘅獨有羶味真喺好特別，而入口有韌勁，店長話佢哋喺用澳洲貨，所以，有一定嘅質素。
日本雞腿肉配京葱 $36
講明喺用雞腿肉，自然比較嫩身啲，入口果然唔會「嚡烚烚」，口感嫩滑帶肉汁，燒烤時間啱啱好，京蔥亦好爽口。上次晌FireBird就喺試過德島嘅「阿波尾雞」，所以，好奇問問雞種喺嚟自邊度，原來喺佐賀嘅「華味鳥」，小弟都喺第一次聽呢款雞種。
宮崎牛西冷 $138
宮崎和牛有幾出名唔使多介紹，和牛中都屬頂級貨色，所以，索價過百蚊串。燒完之反睇唔到油脂分布，但入口充滿油香，又不失肉味。不過，一串得兩件，有啲肉赤。
宮崎豬肉煙肉 $63
除咗牛，宮崎豬都好似唔差，試一串宮崎煙肉，半肥瘦得嚟又唔覺太肥，又有一陣陣煙肉嘅燻香，如果燒燶多少少，帶點焦香再配啤酒就更一流。
燒新西蘭羊架 $68 / 件
試完牛，試完豬，再嚟羊架就啱晒我，新西蘭羊架配上自家製紅提芥辣及薄荷醬，非常有心思。而羊架燒得焦香，口感軟腍又富肉汁，羶羶哋夠晒正，灑啲青檸汁，感覺清爽口啲，但沾紅提芥辣，風味大不同。
宮崎牛肉他他 $220
一輪熱氣嘢，嚟一道牛肉他他涼快吓，將宮崎牛肉做成他他，睇見有少少黑胡椒調味，旁邊再伴有蕃茄粒、青蕃茄、洋蕃茄、豆蓉及一隻生鵪鶉蛋黃，賣相色彩繽紛。擔心牛肉太生就不妨落多少少日式芥末，但我就覺得落丁點就好喇，撈勻送入口品嚐到食才嘅鮮味，可以嘅話，配片薄薄哋嘅脆多士或法包更特別。
和牛富士溶岩石燒 $288
嚟到唔試啲宮崎和牛料理好似無嚟過，一口氣試咗兩款，先喺試石燒，份量有分100g（$288）及200g（$538），店長話用上西冷位，先烤焗至半熟再燒，切片放晌220°C富士山熔岩石上，保持溫熱，並現有幾款烤野菜。平時食鐵板西冷就梗喺燒汁或蒜蓉汁，但依次伴嘅喺酸汁，崎宮牛雪花分布細密，油份重，有個酸汁中和吓就非常好，而肉質不用多講，軟腍到不得了。
煮牛筋肉配鍋粑 $188
另一道宮崎和牛料理喺以原個瓦鍋盛上嘅煮牛筋肉配鍋粑，友人搞笑話似蘿蔔燜牛腩，哈哈。啲牛筋肉極之腍滑，完全燜到腍晒，而白蘿蔔嗦晒汁，好香卻入口無渣。啲醬汁搵鍋粑沾嚟食確喺好好味，差啲仲想追加個白飯嚟撈汁，但已經食得好飽。
「俺の割烹」可以講喺摩登嘅居酒屋，由於食材大都用上日本貨色，所以，出品有番咁上下，加上選擇多，同大班朋友人嚟就最好不過。店長仲話有唔少優惠，如Happy Hour、Ladies Night、Gentlemen Night，有興趣就不妨自己打去問問！
個人評分
味道：8/10
環境：9/10
服務：8/10
抵食：7/10
平均每人消費：HK$530
味道：8/10
環境：9/10
服務：8/10
抵食：7/10
平均每人消費：HK$530
餐廳資料：
俺の割烹 Ore-no Kappou by Ginza Okamoto
中環蘭桂坊德己立街30-32號加州大廈6樓
2328 3302
俺の割烹 Ore-no Kappou by Ginza Okamoto
中環蘭桂坊德己立街30-32號加州大廈6樓
2328 3302
沒有留言:
發佈留言