環亞機場貴賓候機室 Plaza Premium Lounge (East)：環亞（東翼）新場

去機場貴賓室都喺入去食吓嘢、攤抖吓等上機，不過，就唔喺小弟慣常嘅做法，通常喺搭廉航唔包飛機餐先會到訪一下機場貴賓室，當喺提早食個「飛機餐」；又或者搭晨早機，出門口乜都未食，最好就預早少少去機場辧妥登機証後，到機場貴賓室施施然嘆個早餐。過咗離境禁區，最就腳就喺東翼嘅環亞機場貴賓室，所以，經常好多人排，最近，就見佢再前行隔幾步路設立咗「分店」，完全無人排，非常之好。

一走入貴賓室，跟以前原有東翼嘅貴賓室格局差唔多，裡面空間好大，有餐枱位，有梳化位，柔和嘅燈光，予人感覺舒適、輕鬆。最難得喺客人少，想坐邊度都得，拎食物就更加唔使排。

其實一入門口無耐，就已經見喺開放底廚房，食物嘅種類或款式當然唔可以搵啲星級酒店比啦，但作為一頓早餐就已經非常足夠。沙律、湯粉麵、熱盤、點心、粥品、牛角包，仲有埋甜點添。不過，太早未有湯粉麵（準備中）及腸粉供應。

再入啲，屈個灣，仲有麵包、曲奇、生果，以及果汁、汽水、咖啡、紅茶……等等冷熱飲品。卻喺無支裝水供應，想拎支上機飲都唔得。

講明喺攝一攝食個早餐，份量原本都唔打算多，就唔會太多，志在樣樣試一試。先喺一份迷你版自家揀嘅「全日早餐」，沙律菜配油醋、意大利蕃茄乾、車厘茄、黑橄欖、貝殼粉沙律、炒滑蛋、豬肉腸、茄汁豆及牛角包，配一杯冰涼橙汁。食物質素一啲都唔差，蕃茄乾油潤蕃茄味濃，豬肉腸唔喺平價貨色，皮脆有肉香，炒蛋夠晒嫩滑，反而牛角包雖富牛油香，但欠鬆化。

麵包一向喺喜歡嘅食物，所以，追加一份烘多士及意大利香草包，而飲多杯咖啡就唔只喺過口癮，仲喺襯一襯兩件小甜點：甘筍蛋糕及斑尼士蛋糕，估唔到兩件蛋糕嘅質素又幾好喎。睇住航班無延誤，就返時間先行過去登機閘，啲時間就更好用。

依家有唔少信用卡都讓卡主有免費享用貴賓室嘅服務，不妨多加利用，與其晌機場無乜地方好溜達，例不如入嚟飲杯咖啡，食件餅，抖一抖都好吖。

個人評分
味道：7/10
環境：8/10
服務：7/10
抵食：7/10
平均每人消費：HK$0

餐廳資料：
環亞機場貴賓候機室 Plaza Premium Lounge (East)
赤鱲角香港國際機場一號客運大樓6樓離港層東大堂 (禁區)
2261 0888