再入到啲屈個彎，就喺鐵板燒枱嘅位置，共3張鐵板燒枱，同一時間可以應付唔少客人。整體而言，裝修帶和風，但就以簡潔為主，天花掛有唔少櫻花串做裝飾。
此外，仲有一啲廂房，喜歡私隱高啲嘅客人就可以揀入嚟，不過，就唔知有無最低消費，或包房唔知要幾多。
枝豆 $48
朋友要遲嚟，所以，搵啲枝豆、魚乾攝吓時間。先嚟枝豆，暖暖哋，綿綿腍腍過吓口癮。
燒河豚乾 $78
啲河豚乾燒得好香口，望落好飲似好硬，其實軟軟哋，又好咬口，當餐前小食邊食邊等人就最好。
三文魚冰頭漬
小小一碗三文魚頭內啲軟骨位，搵少少醋醃漬，味道酸酸咁，口感卻好爽脆，真喺叫人幾開胃小食。
前菜三味
晌醬汁方面配搭都頗有心思，包括：京都豆腐配芝麻醬、加拿大牛肉配黑醋草莓汁、日本三文魚漬配柚子醋，賣相的骰精巧，為今晚嘅廚師發辧揭開序幕。啲豆腐好滑溜，牛肉質感軟腍，三文魚漬估唔到咁味濃。
赤座蝦
跟住呢道火炙赤座蝦造型非常靚，蝦隻嚟自九州宮崎，蝦肉拆出嚟啱啱好有兩口，輕輕火炙後再放上黑松露醬及金箔，更顯矜貴。入口先有一朕焦香，然後喺黑松露嘅幽香，再細嚼喺一份鮮甜清爽感。
見到師傅開始晌吧位嘅碟擺上漬物，就知喺食壽司嘅序幕，日本芥末、薑片都喺食壽司之用，而黃色嘅漬醃黃瓜好脆口。隨之，就喺逐件逐件壽司上碟，食得好悠閒。足有9貫壽司，一邊食，師傅一路介紹，希望無記錯佢哋啲名啦！
深海池魚壽司
淡色嘅池魚望落好光澤，足見其新鮮度，魚質嫩得嚟帶爽口；壽司飯搓得細細件，鬆軟唔會太死實，一口過放入口啱啱好。
竹籤魚壽司
第二款壽司喺竹籤魚，喺一款極少接觸嘅魚料，加少少火炙處理，再擺點紫蘇葉花做點綴，形態極靚。味道依然好鮮，帶點油潤，微微嘅油脂感，感覺輕盈。
油甘魚壽司
一撮紅紋喺其標記，油甘魚魚質柔嫩細膩，甚有魚香。基本上，壽司內已塗有少少日本芥末，輕輕沾丁點醬油提鮮就好足夠。
金目錭壽司
轉眼，碟上嘅漬物已換上醃漬櫻桃蘿蔔。金目錭被輕輕炙過，配柚子醬，中和金目鯛嘅油脂，食落富油香而不膩。
燒帶子刺身
食完一輪壽司，來一客燒帶子刺身，點解話佢喺刺身，因為只喺輕輕燒過，入口仲保持帶子嘅爽口感，好軟腍，夾塊紫菜同食，都幾有趣。
𩶘魚壽司
開始壽司嘅味道越食越濃，𩶘魚壽司亦有經火炙處理，油香、魚味都較重，燒過後帶微微爽脆感。
醬油漬赤身壽司
紅色嘅赤身經醬油漬，色澤更深紅，卻喺保持光澤。放入口，真喺好有魚味，醬油亦剛好，唔會冚過啲魚味。
拖羅壽司
小弟對壽司、刺身唔喺好精，不過，睇見件拖羅嘅細緻雪花紋就覺得幾高質，色澤粉嫩，油分十足，入口好有即溶嘅感覺，咁好味，真想再嚟多件。
拖羅筋壽司
最後一件壽司喺有驚喜嘅作品，師傅都專登唔講喺乜，等我哋估吓先揭盅。先喺爽爽哋，部份位置好咬口，口感非常有趣，原來喺吞拿魚一個筋位，認真刁鑽。
燒香魚
接住上場喺一道擺得精緻嘅燒魚，條魚叫做香魚，又喺少接觸嘅食材，個人而言，唔算好有驚喜，亦比較多骨，反而青綠色個醬幾得意，嗒落辣辣哋，喺一種叫「鮎蓼」嘅植物整成，另外有一小片花形日本准山，爽脆帶點黏黏感。最得意喺新鮮嘅香魚，會散發出一股西瓜嘅香氣，如果唔喺師傅拎條生魚俾我哋聞吓，就喺唔信會咁神奇。
雜魚湯
之前晌度食鐵板燒都知道近尾聲會上湯品，有別食粵菜咁先飲湯。湯底呈少少奶白色，至於用咗咩魚去熬煮，師傅就無透露，不過，飲落陣陣魚鮮香味。再加少許配菜，令個湯一啲都唔單調。
迷你北海丼
怕你唔夠飽，整多一碗迷你丼，個丼真喺幾迷你，與其話用嚟填飽肚，不如話喺填飽味蕾，因為飯面嘅海膽、蟹肉、三文魚籽夾埋可能多過啲飯，幾樣食材超新鮮，尤其啲蟹肉，鮮甜到痹。
甜點
有兩款選擇：水蜜桃雪糕或櫻花啫喱雜果，小弟喜歡水蜜桃嘅香味，所以，揀上前者。一大球水蜜桃雪糕再灑上脆米，雪糕頗柔滑，水蜜桃嘅味道好清甜，真喺唔錯嘅餐後甜點。
嚟食廚師發辧只有坐吧位，所以，大多人一齊就唔太方便傾到偈，故此，最好兩、三個嚟。而師傅真喺要啲時間逐道菜為大家做，要有心理準備「慢慢」嘆。今晚所試嘅食材，有不少都喺平常少見嘅嘢，好有大開眼界嘅感覺。
個人評分
味道：8/10
環境：7/10
服務：8/10
抵食：7/10
平均每人消費：HK$1,450
味道：8/10
環境：7/10
服務：8/10
抵食：7/10
平均每人消費：HK$1,450
餐廳資料：
鉄人旨花 Shika Teppan-Yaki
銅鑼灣謝斐道477-481號肇明大廈2樓
2892 8819
鉄人旨花 Shika Teppan-Yaki
銅鑼灣謝斐道477-481號肇明大廈2樓
2892 8819
沒有留言:
發佈留言