嚟到就發覺依間店曾經喺嚟過，不過，喺佢嘅前身「Chateau Aqua Oyster & Restaurant」，環境跟上手都有啲相似，所以，好快認出。感覺有啲可惜，Chateau Aqua其實真喺唔差，啲生蠔好有級數，其他菜式亦有水準。
講番Hollywood 49，餐廳佔大廈全層，枱櫈拍得唔逼，加上兩邊對街位都喺偌大嘅玻璃窗，採光十足，感覺寬趟闊落。最鍾意喺佢哋啲枕手皮椅，坐得非常舒服。
走入啲，睇見兩側嘅布簾，就知可以鎅開為另一私人空間。
此外，牆上有啲黑白香港舊街景相片，另一邊又放咗啲外國雜誌，令環境添上點點趣味。
因為食晏時間都喺有限，就無問店員攞個散點餐牌睇，只喺晌樓下入大廈時，見門口有幾份餐牌，就快手影咗張留底。
嚟食晏就當然喺瞄準個午餐餐牌啦，好簡單，兩道菜午餐，包頭盤及主菜，並奉送餐飲定價為$98-$158。
麵包籃
兩個小圓包，一個燕麥，一個竹炭，為今餐午餐打開序幕。兩個包都好軟熟，微微暖，配牛油就最啱我喇。
先講頭盤，3揀1，一喺餐湯，一喺就沙律，不過，可以考慮加$25額外配是日餐湯。我哋兩個都鍾意食沙律，就揀晒兩款沙律。
凱撒沙律
以為大路嘅凱撒沙律樣，但送上枱時好有驚喜，原條羅馬生菜已撈勻醬汁，灑上巴馬臣芝士、煙肉粒、烘包粒，最特別喺成條鯷魚仔放上面，又擺多半隻溏心蛋晌旁邊，賣相已經贏晒。生菜脆到「索索聲」，冰涼清嫩，鯷魚仔好有鹹鮮，整體好睇兼好食。
煙三文魚牛油果沙律
依道沙律就真喺大路啲喇，但同樣賣相無馬虎，而且，勝在用料新鮮。沙律菜底配上油醋， 煙三文魚十分油潤鮮味，牛油果熟透晒，夠軟腍，唔會有生澀味。
主菜一環，就6選1，基本上，雞牛豬魚海鮮嘢都有齊，相信都梗有一款啱心水嘅。朋友唔想食太多肉，平平哋，我哋就要咗一個意大利飯及一客意大利麵粉。
野菌牛肉意大利飯 $98
意大利飯就最蝦人煮，因為火喉唔準，啲米一喺太生，一喺太腍，今次個意大利飯真喺正喎，入口夠晒咬口，米心有煙韌感，但唔會有種生嘅感覺；而且，飯底夠濕潤，又充滿菌香，令到個飯更好食，牛肉雖然只有三數粒，確實唔多，但軟腍鬆化富肉味。
蟹肉露筍意大利粉配番紅花忌廉汁 $98
依款主菜其實喺店長推介俾我哋，因為蟹肉都喺鮮拆，所以，上菜時特別提醒我哋小心，因有可能有少少蟹殼碎或啲硬膜。雖然個樣睇落平平無奇，但師傅煮粉嘅手勢紮實，啲意大利粉煮得恰到好處，咬落有嚼勁，最鬼怕腍晒嘅意粉，每炷粉都掛滿汁，個汁唔喺普通嘅忌廉汁或蕃茄汁，加入番紅花，感覺真喺唔同啲；講到啲蟹肉，唔止多，的確好鮮甜，貨真價實無欺場。
熱檸茶友人喜歡餐後飲熱檸茶，因為可以消滯加清新一下。熱檸茶整壺上，變相飲多兩杯，佢話啲檸檬靚，皮薄有清爽香味，有時確喺有啲餐廳唔在意啲檸檬靚唔靚，覺得飲落都差唔多。
即磨咖啡
小弟就喜歡嘆杯即磨咖啡，睇見面面層咖啡油，已感覺質素唔差，咖啡芳香醇厚，好香濃。
除餐湯，亦可額外加$25配是日甜品，由於問過是日甜品喺伯爵茶芝士餅（只得一款），友人都頗喜歡伯爵茶嘅味道，見都仲有時間，就一於以甜品為呢頓午餐作結。
伯爵茶芝士餅 +$25
件芝士餅外型都幾工整，底層嘅消化餅做得好夠薄，如果隻碟加多丁點裝飾賣相就更好。拮落去，有少少實，入口有少少冰凍感，可能餅櫃過凍，但無疑好重伯爵茶味，芝士味則相對弱啲，算喺不過不失。
雖然件芝士餅未喺咁上乘，但沙律有驚喜，兩道主菜都好好食，再者，環境好舒服，位置或許吊腳少少，但午餐時段變咗唔似下面皇后大道、德輔道咁逼咁多人，呢度喺悠閒用餐嘅好地方。
個人評分
味道：8/10
環境：8/10
服務：8/10
抵食：7/10
平均每人消費：HK$135
環境：8/10
服務：8/10
抵食：7/10
平均每人消費：HK$135
餐廳資料：
Hollywood 49
中環蘇豪荷里活道49號鴻豐商業中心2樓
2347 7009
Hollywood 49
中環蘇豪荷里活道49號鴻豐商業中心2樓
2347 7009
沒有留言:
發佈留言