うまい鮨勘 Umai SushiKan：獨丼一面

小弟曾到訪過關西、北海道及九州，但貴為首都嘅東京，真喺一次都未去過，拖吓拖吓「築地」都計劃好搬去豐州，而我都仲未有計劃到東京走一轉。晌築地內場嘅「うまい鮨勘」落戶香港，選址海運大廈，到訪唔喺因為其過江龍身份，而喺食友嘅誠心推介。從門面所見，餐廳應該幾大，設計又有得氣派，着住和服嘅妹妹負責引路。

香港人一向貪新鮮，仲加上從築地而嚟，想必初期一定好墟撼，所以，趁店家開咗一段日子先過嚟。走進店內，環境果然好闊落，先喺巨型壽司吧枱，喺試「廚師發辧」 最佳之地，往內望，喺一組組嘅卡位，高樓底令空間感更強。整家店都以原木為主，貫徹和風暖色木系。

再走入啲，除卡位，亦有可拼桌嘅小餐枱，所以多少人嚟都無問題。小弟被安排坐晌較入嘅位置，嚟嘅食客又較斯文，所以，感覺幾清靜。坐低細心再睇，牆上刻有好多關於鮮魚嘅資訊，叫人別忘記佢喺一家壽司店。

裝修骨子之外，餐具亦有啲亮點，餐碟印上同一款花紋，筷子喺即棄性嘅，但都睇得出喺高質量貨式，唔喺平價貨帶木刺嘅可比。

而最令人聚焦，相信喺佢哋隻茶杯，厚身嘅瓷杯印有店家嘅名字，最有趣非其他壽司公仔莫屬，有凹凸坑紋，拿上手好有手感，圖案又畫得維妙維肖，日文名稱加上拼音，真喺可以看圖學壽司。

餐牌方面，如一貫日式餐廳做得精美，圖文並茂喺必然。選擇有沙律、玉子燒、屋酒屋風味、天扶良、丼及鍋物、刺身、壽司、軍艦、手卷、卷物，當然，仲有刺身盛及壽司盛啦。

而點菜就有一張巨型點菜紙，跟餐牌一模一樣，只喺單色版，晌喜愛嘅菜式上畫低數量就搞掂，減少口傳或手文之誤。

飲品方面，有近廿款選擇，當中部份果汁、梳打、波子汽水算喺較特別少少。

友人推介依度嘅海鮮丼，所以，一早已定下目標晌海鮮丼之上，而海鮮丼定價由$120-$350。一提到海鮮丼，又回想起舊年晌札幌二条市場嘅「どんぶり茶屋」食海鮮丼當早餐，不知幾爽。

函館丼 $200

咁多款丼中，以北海丼及函館丼最喺心水，前者以多樣性刺身為賣點，後者則以松葉蟹為賣點。其實，都有少少難取捨，但最後揀由松葉蟹肉、松葉蟹膏、松葉蟹棒、海膽、三文魚籽組成啲函館丼，究其原因喺「懶」，唔使自己郁手拆，就有蟹肉、蟹膏、蟹棒食，幾咁「梳肝」。

依款丼好抵食，因為，鋪滿好多食材上面，更額外加有黑魚籽，賣相非好好睇、吸引，無怪乎我要逐樣食材分享吓。

松葉蟹肉、松葉蟹膏

中間一大球就喺蟹肉加蟹膏，小試一啖，鮮味到不得了，絲絲蟹肉絕無欺場，蟹膏嘅豐腴感，很豐盈。

黑魚籽

就咁食比較鹹，基本上都喺預你撈埋入蟹肉、蟹膏一齊食，提升其海水鮮味。

松葉蟹棒

一啖一件，食得叫人不知幾爽，蟹棒極有蟹肉鮮甜味，嗰份新鮮感一湧而出。

海膽

喺加拿大貨色，餐牌都寫明，如想升級為北海道海膽，需另加$50，其實加拿大貨都唔差，一樣鮮甜綿滑。

三文魚籽

色澤鮮橙剔透，外觀飽滿，靚貨不容置疑，一咬開好爆汁，就咁食覺得有啲鹹，撈飯食就唔
啱啱好。

此外，飯粒煮得綿糯有飯香，內裡仲附有濃香嘅菇粒、清爽嘅酸薑片及幼細如髮嘅蛋絲，令整個飯變得多元化，更好食。真喺賣咁嘅價，無疑喺非常抵食。

刺身、壽司、海鮮丼試到啲海鮮食材靚唔靚，而天扶良（天婦羅）就試到師傅嘅手勢，餐廳供應3種天扶良，多心嘅人就好大機會揀上「雜錦天扶良」。

雜錦天扶良 $98

雜錦款式包括有3隻海老天扶良，而蕃薯、珍珠筍、大菇、秋葵各有一件，並以竹筲箕盛載，好有和風風格。除海老嘅脆漿厚身少許，其他天扶良嘅脆漿都煎得薄，蝦肉好鮮爽，蕃薯極之粉甜，珍珠筍出奇地爽脆，大菇、秋葵都好好食，足証食材靚，炸功又了得。

雖然無去過東京築地嘅「うまい鮨勘」，但今晚晌香港店所食嘅，都覺得水準高，叫人「鮨」味無窮。此外，服務好好，感受到店員用心。

個人評分
味道：9/10
環境：8/10
服務：8/10
抵食：8/10
平均每人消費：HK$330

餐廳資料：
うまい鮨勘 Umai SushiKan
尖沙咀廣東道17號海港城海運大廈地下OTG04號舖
2115 9956