室內以黑白為主調，最特別喺窗口採全開放式，再加置少少盆栽，加添清新氣息。配合柔和嘅燈光，以及輕漫嘅音樂，使氣氛輕鬆。不過，溫馨提示，因為窗口外設吧位，又俾人食煙，故遇上有人食煙，坐晌較近門口位置嘅地方，會聞到輕徹煙味，亦因此，我哋都要求調到最入嘅餐枱避一避。
餐廳好簡單，一面喺食物：前菜、意大利麵、主菜、燒烤、甜點，選項唔算多，屬貴精不貴多嘅格局。
另一面就喺飲品：紅白餐酒、香檳、啤酒、烈酒、雞尾酒、汽水、果汁……等等，選擇算多。就算唔嚟食嘢，都好啱飲吓酒嘅朋友。
此外，每日3:00pm-8:00pm更設有歡樂時光，啤酒配串燒，都只喺賣$48，定價吸引。
就算以上優惠唔啱，有唔少飲品晌歡樂時光時段都有優惠價，所以，我哋都揀咗啲非酒精雞尾酒嚟飲。
Green Summer Cooler $45（正價$55）
外面天氣鬼咁熱，故揀杯涼透心嘅Green Summer Cooler降吓溫，淨睇樣都爽晒；以薑啤、菠蘿汁、青檸汁及薄荷糖漿混合而成，賣相醒神，入口清爽，可謂涼意直送。
Rose Ladies $45（正價$55）
老友杯點咗Rose Ladies ，佢話上網睇人貼出嚟嘅相好靚，就哋呢個原因揀佢。用咗玫瑰糖漿、荔枝糖漿、紅莓汁同菠蘿汁溝成，再放上幾玫瑰花瓣，的確好吸晴。味道方面，清味帶果香，微微酸感覺唔錯。
咖喱燒雞墨西哥烤餅 $58
老友未食過墨西哥烤餅，所以，對此菜式頗好奇，雖然佢擺晌主菜類，但似前菜多啲。一客有3件，薄薄哋咁填滿咖喱雞肉，啲烤餅外皮頗脆口，雞肉亦嫩滑，但最欣賞喺再混入菠蘿，晌咖喱中添加一份清甜味。
烤美國豬背骨 $88
小弟就喜歡食肉，所以，揀半份烤美國豬背骨，而全份就賣$158，但兩個人食半份就啱啱好，半份有4支骨。因喺豬背骨，比豬肋骨厚肉啲，所以啖啖肉，落刀嗰吓已感受到啲肉好鬆化，輕易骨肉分離，食落果真軟腍鬆化，口感一流，又帶有濃濃煙燻香味，伴菜嘅栗米亦好清甜，無話燒乾水，依道菜絕對值得推介。
烤海鮮拼盤 $248
萬眾期待嘅烤海鮮拼盤卒之登場，亦喺今晚嚟呢度嘅目標，現場睇見份拼盤跟睇相真喺有少少感覺唔同，震撼感會多啲。整份拼盤早已晌餐牌寫明有全條烤魚、蠔、帶子、珍寶蝦及軟殼蟹，墊底有唔少沙律菜，但無作任何醬汁調味，亦無葡萄伴碟，依個細節位執執感覺更好。
烤帶子
以慣常嘅蒜蓉嚟做，喺較惹味嘅做法，侍應話北海道帆立貝，唔怪之得啲帶子咁鮮，入口鮮甜，質感爽口。
焗蠔
同以蒜蓉嚟做，蠔味都幾夠，但小弟就覺得可以考慮改改配煙肉碎，鹹香嘅煙肉更能吊出蠔味，而且，唔使跟帶子咁又喺蒜蓉嘛！
燒珍寶大蝦
初時以為喺越南大頭蝦，侍應話喺泰國貨，水準一樣不俗，蝦肉爽彈鮮甜，蝦膏唔少，夠晒甘腴。
酥炸軟殼蟹
炸到極為酥脆，入口「咯咯聲」，但又一啲都唔油，不過，感覺就有少少乾身，所以，沾點燒汁會效果好啲。
烤全條花魚
見人哋啲食評寫喺日本嘅「喜之次」，可謂不惜工本，但唔知喺咪成本問題，抑或來貨問題，是夜嘅全魚只喺日本花魚，簡單開邊灑鹽燒，賣相好睇。魚肉嘅口感較實淨，但魚味濃，卻有啲鹹，若非插咗支燒烤叉，可能錯以為喺「一夜干」呀，哈哈！
烤焗棉花糖香蕉朱古力批 $48
餐廳嘅甜品選擇唔多，就只有3款，雖然當中嘅烤焦糖菠蘿喺店方推介，但我哋就想見識吓個棉花糖香蕉朱古力批多啲。熱烘烘出場，面層鋪滿棉花糖，散發出陣陣香味，一羹插到底，有類似布朗尼墊底，再一層香蕉果肉，不過，啲棉花糖化得好快，下面嘅香蕉同朱古力漿又融為一體，所以，啲相影得麻麻，但個朱古力批真心好食，濃香濕潤，不過，要有少少心理準備，因夾雜好多棉花糖，喺少少偏甜。
整晚嘅上菜速度啱啱好，一道菜接一道菜，不急不緩，食得好輕鬆，而侍應嘅招呼好到位，添水、換碟都做到足，又好禮貌，讓人感覺自在。加上環境、食物都好，真喺官涌街一個小發現，值得再嚟。
個人評分
味道：8/10
環境：8/10
服務：8/10
抵食：8/10
平均每人消費：HK$290
味道：8/10
環境：8/10
服務：8/10
抵食：8/10
平均每人消費：HK$290
餐廳資料：
Flâneur
佐敦官涌街5號地舖
3956 9601
Flâneur
佐敦官涌街5號地舖
3956 9601
沒有留言:
發佈留言