踏入餐廳，地方唔大，卻全無侷促感，皆因對街一面喺落地大玻璃，視覺開揚，又有高嘅樓底，再加上吊起唔少裝飾性植物，雖然喺假嘅，都令整體予人清新有活力。而且，枱與枱之間排得唔密，牆上掛起唔少畫作，叫人感覺舒適！
友人未到，先翻一轉餐牌，有一系列全日散點菜式，如小食、沙律、熱盤、漢堡、全日早餐、意大利麵，選擇唔算多，但以咖啡店以言，足以應付日常需要；況且，晌餅櫃仲見有啲鬆餅、牛角酥、蛋糕之類輕食及甜點。
晚上嚟，就梗喺打算叫晚餐，晚餐底面兩頁共6款選擇，有兩款全日早餐、漢堡、意大利麵、鰻魚飯、三文治，賣$88-$108，並配咖啡或茶，加上舒適環境，定價相宜。
Meat Lovers $108
晚餐選擇中，除咗ASK全日早餐外，依一款Meat Lovers都頗有全日早餐嘅格式，但絕對喺食肉獸嘅頭號選擇，超啱晒我添。食材包括牛肉漢堡扒（可改選雞肉漢堡）、煙肉、香草雞肉腸、芝士、大量粗薯條、牛角包，嘩！上枱時擺到一碟都喺，睇見都興奮呀！最正喺煙肉、雞肉腸打孖上，牛角包又開咗半，同朋友共享就方便得多。
牛肉漢堡扒相信喺手打貨色，質感非常鬆化，雖無提及喺咩牛種，但好夠肉味；煙肉脂肪少，煎得啱啱好，鹹香唔乾；雞肉腸賜衣脆口，入口好有香草味，口感唔會好似平價貨咁一口粉；薯條亦脆而不油，唯挑剔嘅喺芝士就咁放上漢堡扒有啲嘥，做個芝士汁淋落啲薯條度就仲正，而牛角包明顯放耐咗，酥化感大減。
日式照燒鰻魚飯 $98
晌咖啡店賣意大利麵一啲都唔出奇，但有日式鰻魚飯就估佢唔到，更估唔到友人喺鰻魚飯粉絲，真喺一拍即合啦。碗日式照燒饅魚飯賣相一啲都唔失禮，由盛器、鰻魚、配菜都做得一絲不苟，啲醃蘿蔔好爽脆，牛蒡苦中帶甘，果然有東洋蔘之名。
鰻魚燒得油香，醬油味香濃，質感好嫩滑，唯改善位喺啲飯粒，較濕而有些微爛嘅感覺，失去咗珍珠米嗰份黏糯感。
貴為咖啡店，咖啡嘅選擇自然成為焦點，飲品一欄，咖啡嘅種類確實唔少，但成功興否都仲要取決於質素嘅高低。
但可以肯定嘅一點，就喺唔飲咖啡嘅朋友，嚟到都唔使擔心無選擇，因為，見佢哋仲提供有多款配搭有新意嘅特色梳打，唔同味道嘅朱古力，以及百分百嘅有機果汁。
此外，咖啡唔啱，凍飲、朱古力又唔啱，花茶、紅茶會喺你心水嗎？見吧位一排Fortnum & Mason茶罐，雖然小弟唔認識依個英國品牌，但見啲茶罐精美古雅，再上網查查就知咩來頭啦。
此外，仲有啲轉飲或加配優惠，轉其他飲品+$5 / 凍飲+$8 / 特飲+$20，配是日精選蛋糕+$22。不過，再睇睇飲品餐牌嘅分類，發覺轉飲優惠唔喺太清晰，最好落單前問問店員轉飲依款嗰款要補幾多，避免誤會。
法式燉蛋味拿鐵 +$5
單品價$38，但晚餐關係，補$5就可以享受到杯咁正嘅拿鐵。睇外觀，咖啡表面平滑，唔會有汽泡嘅出現，再者拉花嘅花紋細緻，可見咖啡師嘅手勢真喺有一手。再飲一口，醇香度十足，而且口感均勻，再足證撞奶泡沖調嘅技巧高。不過，法式燉蛋口味唔喺太識分，下次都喺飲焦糖或榛子口味啱啲。
阿法奇朵 +$8
友人就較喜歡配上雪糕嘅阿法奇朵，同樣單品價為$38，但又唔知何解喺補$8，但總之都好抵。以雞尾酒杯盛載住雲呢拿雪糕球及意大利濃縮咖啡，友人就喜歡雪糕連咖啡一羹過食，話咁先嚐到兩者自身味道，之後待佢溶溶哋先飲，感覺香滑細膩，有啲似咖啡奶昔。
額外加配甜品都喺補$22，極之划算，從餅櫃所見，只剩番5款蛋糕：熱情果慕絲蛋糕、意大利芝士餅、藍莓芝士餅、松露朱古力蛋糕及綠茶慕絲蛋糕。
松露朱古力蛋糕 +$22
沉實嘅松露朱古力蛋糕可以講喺實力派，底下嘅朱古力松露軟心蛋糕好香濃（松露喺指佢嘅質感，咪以為有松露嗰種幽香味），加入脆脆底更添脆口感，而上層朱古力慕絲十分香滑，放晌石黑板再加啲玫瑰乾花，真喺賣相都執到正。
熱情果慕絲蛋糕 +$22
鮮黃色嘅熱情果慕絲蛋糕，外觀就非常搶眼，以消化餅作為餅底，加入熱情果慕絲，中間再夾多屠熱情果果蓉，故此，熱情果果味十足，但出乎意料之外又唔喺好酸，配咖啡真喺一流，喺小弟嘅超推薦。
順帶一提，佢哋都有午餐供應，不過，就只有3款菜式，有鳥冬、意大利麵，定價為$98-$138，比晚餐還要貴，但食材就用上鮑魚、黑松露、鮮帶子。
果然8:00pm準時閂門，但只限於收起門口啲餐牌，我哋原來坐到過鐘都唔知，不過，店員亦無趕我哋走，加上整體服務幾好，好似追加甜品時，又自動換上新餐具，仲唔收加一添，所以，我哋都稱心滿足地離開！
個人評分
味道：7/10
環境：8/10
服務：8/10
抵食：8/10
平均每人消費：HK$130
味道：7/10
環境：8/10
服務：8/10
抵食：8/10
平均每人消費：HK$130
餐廳資料：
Ask
上環皇后大道中202號The Putman地下A號舖
2677 1131
Ask
上環皇后大道中202號The Putman地下A號舖
2677 1131
沒有留言:
發佈留言