估唔到，連食晏都咁旺場，好在我哋約得早，唔使多點等位，但食完都成經兩點，反而門外有更多人等位。鋪位呈長形，所以，空間一直向入面延伸，地方頗大，裝修簡約中顯出一份高雅，因為近門口有套藍色絲絨梳化椅，既坐得舒適，又可以細看街上百態，自然成為搶手位，不過，整間餐廳都喺一派輕鬆咖啡室格局，趁着星期六、日嚟食個午餐或下午茶，的確優哉游哉。
星期日無午餐供應，但散叫睇落價錢亦唔貴。菜式嘅選擇唔算好多，攤開餐牌4頁顯示晒，類別包括小吃及沙律、意粉及麵包、自家製和牛漢堡、全日早餐、窩夫及甜品、各款飲品，但睇落款式喺貴精不貴多。
經典凱撒沙律 $58 （加海蝦+$18）
除選配加海蝦，亦可以加配雞扒或煙三文魚，同樣都喺額外加多$18。啲沙律生菜冰涼爽脆，車厘茄亦好鮮甜，醬汁撈得勻巡又唔會太厚身，食落有點點鹹鮮味，應該如傳統做法加入鯷魚；此外，海蝦又大隻，入口爽彈。咪睇沙律好似將啲材料撈埋一齊就喺，手勢都足以影響個味道，今個凱撒沙律絕對喺高水準作品。
焗芝士牛油鮮菌薯皮 $52
薯仔類菜式一向都好鍾意食，炆薯仔、炸薯條、薯蓉、焗薯……等等，焗薯皮更喺喜愛嘅菜式之一。睇啲薯殼，就知用上美國大嘅薯種，同埋為吃食落有份脆口感，薯肉都刮到好薄，少少肉連皮，確實幾香脆，加上好多菇菌同芝士，濃香惹味。食嘢小弟就特別留意啲細節位，咁先睇得出間店做菜用唔用心，除咗面層嘅芝士睇得到用上巴馬臣加車打兩款芝士外，伴碟沙律菜嘅黑醋更喺食得出搵糖煮過，味道唔會得個酸字，質感更喺厚身啲。
明太子煙肉忌廉意大利粉 $76
個意粉煮得好咬口，口感剛好，而個忌廉汁好香滑，內裡加入唔少明太子，所以，食每一炷意粉都食到，而且，味道又帶點辛辣，加埋紫菜絲、煙肉碎，惹味香口。
鮮奶咖啡 $36 / $39
嚟到咖啡室，鮮奶咖啡喺小弟首選。差$3，就梗喺要杯大啦，拉花喺複雜嘅天鵝圖案，印象分自然大大加分。唔使攪就咁入口，唔喺因為要保持個圖案唔化，而喺如果撞奶泡撞得好，夠均勻喺唔使攪都飲到嗰份平均嘅感覺。眼前依杯鮮奶咖啡的確唔錯，算平均，味道亦醇香，口感柔滑！
迷人水果茶 $42
表姨甥女就較為想試試啲果茶，所以，水果茶就啱晒佢。小弟亦倒咗一小杯嗒吓，茶味唔算好濃，所以，亦唔做搶咗水果嘅果香味，內裡有火龍果、青蘋果、紅蘋果、橙等等，飲落茶中有滲出少少果香。咪睇佢只喺果茶一杯，細節位就喺套杯具，純白加襯凹凸暗花，高貴典雅。
焦糖香蕉雪糕窩夫 $78
店內嘅甜品除是日芝士餅外，主打就喺窩夫，一共有6款選擇，窩夫亦喺表姨甥女嘅心水甜品。只賣$78我覺得絕對超值，因為淨食個窩夫時你會嚐到濃濃蛋香，質感又夠鬆脆，而焦糖香蕉更為出色，香蕉面薄薄一朕焦糖，焦香脆口，啲蕉又夠熟；再者，雲呢嗱雪糕球清楚睇到粒粒雲呢嗱籽，足證唔喺平價貨，事後知道喺用上Movenpick品牌，怪不之得軟滑而富奶香，整件事變得就喺美味！
除咗星期日啲後生仔起身晏，嚟食午餐都晏啲，其次，佢啲窩夫真喺好掂，估計亦喺過咗兩點都仲咁多人等位嘆下午茶嘅原因。Charm意解魅力、魔法，Cafe Charm's絕對可以讓人感受到食物嘅話喺有份美味嘅魅力！
個人評分
味道：9/10
環境：8/10
服務：8/10
抵食：8/10
平均每人消費：HK$200
味道：9/10
環境：8/10
服務：8/10
抵食：8/10
平均每人消費：HK$200
餐廳資料：
Cafe Charm's
紅磡黃埔新天地3期百寶坊地下G27號舖
3480 6386
Cafe Charm's
紅磡黃埔新天地3期百寶坊地下G27號舖
3480 6386
沒有留言:
發佈留言