開得晌荔枝角福榮街尾，入夜鬼影都無隻，明白主力喺做街坊生意。傳統酒家格局，望落客人都喺街坊多，一入門口就有部長、經理埋嚟打招呼。星期六晚嘅晚市，差不多座無虛席，目測所見都喺嚟打邊爐多。不過，9:00pm過後只得番幾枱客，皆因9:00pm後嘅任食火鍋時段都只喺平得嗰$10。
任食火鍋，任點任食任飲2.5小時，星期六晚每位全包價$158，包湯底、茶芥、加一，唔使怕失預算。湯底共有7款，但需視人數可選湯底數量，我哋人多勢眾可以揀兩款。
三文魚、冰鎮海蝦
除咗火鍋生料任點之外，仲有任食三文魚及冰鎮海蝦，趁個湯底無滾起，點咗三、五、七碟返嚟食住等。估唔到，啲三文魚又幾得喎，幾新鮮，又夠油潤，加上件件厚切，入口啖啖魚，所以，食完一輪個湯底未滾再點多一輪；而冰鎮海蝦亦都無欺場，一碟有十多隻，隻隻有番咁上下大，唔會蝦毛咁細，就算再點都一樣俾咁大碟我哋，果然足秤任食。
重慶雞窩
個重慶雞窩先滾起，當然趁熱辣辣食，都OK喎，滾起嚟激發辛辣香氣，入口雞件夠辣夠惹味，肉質又幾嫩滑，不過，只得半隻雞，一人一件唔使眨眼都無晒。
甘筍粟米海底椰
一個濃湯，另一個湯底就要清一啲，不過，個甘筍粟米海底椰湯底又清得緊要，得好少料，幾嚿甘筍，幾嚿粟米，好似無乜味咁，總之要個皮蛋芫茜湯可能仲好。
各式時蔬到出面攤檔自取，時刻都保持4款新鮮蔬菜供應，而側邊就喺醬料自助區，金銀蒜、芫茜蔥花、沙嗲、辣椒、豉油……等等擺晒晌出面。
打邊爐點可以無汽水，一櫃百事、七喜、美蓮達、樂怡仙地、嘉士伯、竹庶水（酸梅湯缺貨）任取任飲，絕對令人飲得暢快。我哋就啱啱坐晌雪櫃隔離，非常就手，罐裝嘢唔知飲咗幾多，但竹庶水前前後後都拎咗成7渣，飲嘢都抵番晒。
火鍋生料
睇張點菜紙，一共有近60款嘢食，不過，部份交叉咗講明無供應，但有啲剔完又剔，好似金錢牛展、炸魚皮，成晚都無嚟，然而，整體大部份食物都有貨，嚟親亦都好足數。
9個大漢成晚唔停咁點，唔停咁食，點點埋埋好多嘢，小弟就唔逐樣講，盞嘥大家時間，俾啲相等大家有個參考之餘，亦概略睇睇質素大概喺點。個人而言，俾百零蚊任食，佢哋啲質素已經算好唔錯，食落感受到啲料頗新鮮，尤其手切肥牛、廣島蠔、脆肉鯇、鮮魷魚，真喺夠晒鮮味。
食到尾，個湯底咁香濃，配公仔麵或烏冬就最好不過，雖然只喺大光麵，並非出前一丁，但個湯底咁精華，搭大光麵都OK啦。
仲有幾個死佬都仲未夠喉，「安哥」兩份手切肥牛、一份雜丸及公仔麵，加啲沙嗲，整碗茶記版沙嗲肥牛雜丸公仔麵，夠晒滿足嘞。
今回大家都好盡興，飲又飲到夠，食又食到飽飽，而且，啲阿姐招呼唔錯，有求必應又快手，期待下一次嘅死佬飯局，應該會喺一、二月嘅蛇宴或團年飯喇！
個人評分
味道：8/10
環境：7/10
服務：8/10
抵食：9/10
平均每人消費：HK$158
味道：8/10
環境：7/10
服務：8/10
抵食：9/10
平均每人消費：HK$158
餐廳資料：
明彩海鮮酒家 Ming Choi Seafood Restaurant
長沙灣福榮街552號聯邦廣場地下1-3號舖
2762 9138
明彩海鮮酒家 Ming Choi Seafood Restaurant
長沙灣福榮街552號聯邦廣場地下1-3號舖
2762 9138
沒有留言:
發佈留言