餐廳唔算好大，呈長形，開放式廚房設晌入面，廚房邊就喺「吧位」，坐晌吧位可以探頭睇到師傅做麵。而一室深褐色實木枱櫈，裝潢簡潔，不過，其實好多拉麵店格局都喺咁上下。枱上都有一大壺冰水，喺店方建議俾客人飲用解膩，如果有啲玄米茶提供，唔知會唔會感覺仲好呢？
過膠餐牌，底面兩頁紙睇晒，拉麵、小食、飲品，圖文並茂有咩揀。點餐紙上如選擇題，揀拉麵款式外，仲可以揀麵嘅硬度、要唔要蔥、其他追加……等等，喜歡點剔就點剔。而拉麵共有6款，定價於$78-$108，追加配料多達8種，小食則只有3款，明顯都喺拉麵以外再賺多點「外快」。
松竹梅白壁藏Mio清酒 $55
之前晌I兄屋企食佢嘅私房菜已經試過依款酒，佢話賣$55抵飲，所以點一支回味吓，再者，佢對酒又算頗有研究嘅。依支「澪」有氣清酒上次飲過，真喺幾得意，首先寶藍色酒樽非常型格，修長外型顯得有點高貴。咪睇佢斟出嚟好似白酒咁，其實喺日本清酒，仲加入氣泡，入口冰涼爽快，甜酸味細緻，又帶點果香，酒精度得5%，絕對好易上口唔怕飲醉。
伊藤園綠茶 $15
始終飲酒依家嘢唔喺小弟強項，陪朋友淺酌少少，我還是飲綠茶啱口味啲，尤其食拉麵，一向啲湯底都好濃郁，有啲茶中和吓，感覺有啲去膩嘅作用。
雖然，無論拉麵、小食，我哋各有各點，不過，嚟到都會喺分甘同味，咁就可以樣樣試到。
我哋揀咗入餐廳最尾嘅二人枱，較少受騷擾。牆上有張店家嘅小溫提，喺有關替玉嘅用意、麵條嘅硬度及叉燒嘅厚度小解讀。
此外，枱上有自家製辛辣高菜、酸薑絲及即磨芝麻，前兩者夾少少淺嚐，啲高菜都幾辣吓。而即磨芝麻就有晌碗雞白湯豚骨拉麵度加少少，可提升點芝麻香，然則碗黑松露拉麵本身已好幽香，就唔使多此一舉。
雞白湯豚骨拉麵 $83
喺一款以雞湯為主，再混入豚骨湯為副作湯底嘅拉麵，所以，無齋豚骨湯咁濃膩，但味道仍然咁鮮香。拉麵基本已包紫菜、芽菜、黑木耳及蔥花，加上5小片黑豚做嘅腩肉叉燒，因為切成薄片，唔會覺得好膩，卻又有點油香，口感有啲咬口。老友選普通硬度麵條，口感還可以，我哋覺得配硬麵應該效果合我哋口味多啲。
我哋同時都追加溏心蛋（$12）及木耳（$7），前者做得有水準，溏心效果一流，又帶半分醬油香；後者，唔使多講，有益嘅嘢唔怕多食。
黑松露拉面（限定拉麵） $108
今次遇到嘅「限定」喺以濃重嘅豚骨湯為湯底，配上肩肉叉燒及黑松露醬嘅黑松露拉面。據店員介紹，佢哋啲豚骨湯底每鍋都用上過百斤豚骨、雞骨熬煮十幾個鐘，而松露醬嚟自意大利貨色，所以，兩者混和真喺濃郁幽香到不太了。而3大片同樣以黑豚做嘅肩肉叉燒，有入口即溶嘅感覺，不過，老友嫌佢太薄，無乜口感，食落好似得陣風，哈哈！麵條選硬身，果然效果正好，煙韌而滑溜，又掛汁。
男爵薯餅 $33
一客有兩件，炸得金黃，一啖咬落去好鬆脆。男爵薯喺日本一種幾出名嘅薯種，不過，依款薯餅有一半名不副實，皆因一件喺薯餅，另一款喺紫薯餅，一鹹一甜。無論男爵薯，抑或紫薯，薯味都夠濃，質感夠粉，紫薯內更加入少少栗子碎，而且，炸功都唔錯，入口油感唔重。
對食拉麵，小弟唔算有咩獨特嘅見解，不過，今晚所食到嘅兩碗拉麵，都覺得不俗，既唔使花太多時間等位，服務又到位。登龍街漸漸變成一條拉麵街，要繼續立足，不甘示弱，真喺要不斷努力。
個人評分
味道：8/10
環境：7/10
服務：8/10
抵食：7/10
平均每人消費：HK$170
味道：8/10
環境：7/10
服務：8/10
抵食：7/10
平均每人消費：HK$170
餐廳資料：
金田家 Kanada-Ya
銅鑼灣登龍街34號地下
2889 3355
金田家 Kanada-Ya
銅鑼灣登龍街34號地下
2889 3355
沒有留言:
發佈留言