雖然只喺間咖啡茶室，但打着法式旗號，自己唔馬虎，從外而內，一派法式街頭小店嘅模樣，裝修雅緻，精巧嘅木質裝潢，仿磚牆，書櫃，喺幾咁有古典韻味。不過，逼逼夾夾就肯定喺個無奈嘅事實！
食物琳瑯滿目陳列晒出嚟，一組又一組玻璃櫃，放滿三文治、沙律、雪糕、法式蛋糕、牛油蛋糕、麵包、牛角酥、丹麥酥、馬卡龍，色彩繽紛，更喺目不暇給，睇見樣樣都想試！此外，仲有咖啡、招牌熱朱古力、花茶及各式支裝凍飲。
除輕食，亦有提供多款熱食主菜，如薄餅、意粉及法式鄉村熱鍋，同樣喺誘人之選。我哋幾個嚟食下午茶，就當然以輕食及甜點為主！
燒烤醬手撕豬肉三文治 $48
十多款三文治中，對依個手撕豬肉最有期待，咪睇佢個扁扁平平，其實都有幾多豬肉，可惜一啲都食唔出手撕嘅口感，反而似吞拿魚蓉，配個燒烤醬，味道還不錯。
煙肉芝士蛋餅 $32
小弟較喜歡用蛋批嚟形容佢多啲，因為，一層薄薄嘅酥皮盛載住烤蛋。每件蛋批都頗大件，橫切面睇埋佢，都好足料，蛋味唔算好強，但質感唔錯，挺身得嚟都稱得上軟綿，而混入煙肉、芝士，令哋道鹹香好食。
鹹點打底過後，就喺嚐甜嘅時間，法式糕點實在選擇多多，有15款之多，睇得眼花潦亂，樣樣都想試。
茉莉茶黑莓餅 $41
佢哋每款餅嘅賣相都做得煞食誘人，而依款黑莓餅，外型瑰麗高雅，大大粒黑加侖子作餅面點綴，非常突出主題。切開睇到有底而上有朱古力海綿蛋糕、兩層唔同嘅紅莓及黑莓慕絲、其餘為茉莉茶慕絲、外層嘅紅莓果醬。因為香莓嘅比重佔多，所以，酸香味十足，茶香味就太隱約，至於慕絲則做得柔滑。
朱古力開心果餅 $41
球體嘅外型，做得圓滑，而表面嘅鏡面朱古力手功細膩，唔單止平滑，一啲坑紋、線紋都無，而且，朱古力調溫閃亮，一點金鉑更顯矜貴。蛋糕內嘅朱古力慕絲及開心果仁醬，配搭和諧平均，唔會太過搶對方鏡，加上底下嘅朱古力果仁脆脆，令整件蛋糕都美味爆燈。
鮮奶咖啡 $36
蠻有期待嘅鮮奶咖啡，聲稱用上illy咖啡豆，醇香度有晒保證不過，沖咖啡嘅手勢就略有不足，撇除拉花靚唔靚嘅問題，入口嘅口感唔平均，一飲就會感覺有咖啡嘅醇香，卻無奶泡嘅柔滑。反而，伴咖啡嘅開心果仁脆片好好食。
泡沫咖啡 $36
並無試過杯泡沫咖啡，所以，難以下任何評語。不過，喜歡飲咖啡嘅友人都話好，相信應該好唔錯。
本來作為下午茶已經夠晒皮，不過眼見咁靚咁多式口味嘅法式冰淇淋 ，我哋又忍唔住再點多兩球雪糕嚟試試。如果只要普通杯裝，收費$36，加多個花傘形脆筒，都只喺多兩蚊，即$38，無理由唔要「筒」㗎！
開心果口味
開心果味確實夠突出，但算唔得超強嗰層次，因為記得晌2/3 Dolci嘅開心果仁雪糕就真喺超濃郁。不過，依度嘅有加入開心果仁粒， 又加番啲分。
芒果口味
如果講濃郁度，芒果味就肯定勁過開心果味，又富奶香，口感軟滑，不過，食到尾發覺個雪糕球唔喺好多，因為個脆筒底喺升高咗，感覺變相少咗。
試咗多款美食，我哋一致公認佢啲法式凍蛋糕最得，雪糕亦都好食，而輕食類就不過不失，反而咖啡就失色咗少少。再補充少少服務方面，可能太旺太多人幫襯，一枱客接一枱客，見店員都忙過不停，不過，仍經常見枱上剩餘嘅杯碟無暇清理，故此，服務要扣啲分。
個人評分
味道：8/10
環境：7/10
服務：7/10
抵食：8/10
平均每人消費：HK$105
味道：8/10
環境：7/10
服務：7/10
抵食：8/10
平均每人消費：HK$105
餐廳資料：
Passion by Gerard Dubois
旺角亞皆老街8號朗豪坊4樓11號舖
2967 8812
Passion by Gerard Dubois
旺角亞皆老街8號朗豪坊4樓11號舖
2967 8812
沒有留言:
發佈留言