銅鑼灣稱得上城中貴地段嘅地方，寸金尺土，為咁做生意將地方用到盡絕對可以理解，不過，嚟到Greenhouse，甫踏入門口，已經喺另一番景象，雖然講唔上翠綠盎然，但喺環境闊落，樓底特高，枱櫈嘅編排亦唔覺逼，所以，空間感強；天花架設嘅花糟，滿載綠油油嘅小盆栽，又有啲被倒吊住，玩味十足，配上昏黃小燈，反死變得蠻有氣氛，跟溫室帶嚟嘅溫暖感倒有幾分合拍，但個人而言，卻希望溫室可帶嚟一份陽光、活力嘅感覺。
細閱一轉餐牌，由小食、爐端燒、輕食、薄餅，以至主菜，都包含好多創意，好難講屬邊一菜系，似喺東西融匯、中西合壁，不拘一國，但睇得出加入好多亞洲風味元素。
同朋友先嚟兩杯飲品，本來揀其他凍飲，不過，店員極力推薦嘅Butterfly Rainbow Iced Tea系列，喺以Butterfly Pea Tea加落唔同嘅果汁而成，成品猶如彩虹般咁幻化。以前，曾晌Greyhound遇過依一款花茶，有啲地方譯為蝶豆花茶、藍蝶花茶或蝴蝶藍花茶，亦曾聽過有譯佢為藍蘭豆花茶。餐牌都有標明，佢嘅好處多籮籮，當然佢又唔喺咩靈丹妙藥，唔會飲一杯就藥到病除，但點都喺一杯保健有益嘅飲品，正所謂無病咪當強身囉。
Blue Sun Set $48、Mid Night Gloria $48
小弟就要咗一杯「黃昏」，純粹因為見佢有菠蘿汁打底，再加有新鮮青檸汁，鮮香茅、青檸皮做裝飾，上枱後由店員將蝶豆花茶倒入，將「黃昏」慢慢染紫，好有詩意。味道以菠蘿味為主，帶點酸香，而蝶豆花茶本身花香唔突出，只喺色澤及其功效喺一個亮點。
友人嘅「夜半」，則以西柚汁、熱情果漿、新鮮青檸汁組合而成，後加入蝶豆花茶，同樣色澤亮麗，味道清新而略酸，不過，配稍後濃味嘅雞翼及烤菇都唔錯。
餐牌中嘅滋味小吃、分享小吃、爐端燒都屬於小食類別，夾夾埋埋有成30款，所以，小食真喺有好多選擇，我哋揀咗一客雞翼及一份烤菇。
青檸香茅雞翼配秘製森巴醬 $68
一客有4隻雞翼，賣相平平無奇，本以為以味道出奇製勝，實質只喺得個森巴醬有啲料到。期望中嘅青檸及香茅味，實在好薄，入口真喺跟普通炸雞翼唔喺差得幾遠，還好嘅喺雞翼炸得甘香，外皮脆而唔油，蘸滿森巴醬，鹹鹹辣辣，依然喺惹味好食。
烤波多黎各菇配韓式泡菜芝士 $42 / 串（2串起）
所有爐端燒都要兩串起計，其實件大黑菇本身幾好食，菇味香，又多汁，加入大量車打芝士，絲絲軟綿，香濃惹味，又包含少少韓式泡菜嘅酸辣香味，感覺幾得意。
嚟到主菜類，有好幾款都想試，最後揀咗兩款中價位嘅青咖喱銀雪魚及星洲炒米，因為，睇起嚟感覺頗有特色。
蕉葉烤青咖喱銀雪魚配香料烤米飯 $198
甚有泰式風味嘅蕉葉烤銀雪魚，賣相好吸引，而且，銀雪魚烤得焦香，入口既油潤，又香嫩，唧少竹少青檸汁，更有提鮮作用；不過，所謂香料烤米飯似乎只喺珍珠米而已，香料唔通就喺講緊銀雪魚前方嘅香料？青咖喱又究竟喺撈飯，定蘸魚食用呢？
龍蝦鴨肝星洲炒米配西班牙火腿 $178
茶記嘅星米加入龍蝦、鴨肝及西班牙火腿成為富貴版嘅「升」洲炒米，期待喺有嘅，但效果卻唔喺預期咁有特色。其實個星米本身炒得唔差，幾香口又唔油，辣多少少更惹味，不過，撈埋啲富貴配料，尤其似喺後加咁樣，產生唔到「協同效應」，只喺感覺多咗堆貴價食材。
最後，見好多人都讚其甜品，食完小食及主菜，我哋都有啲飽飽哋，不過，面對廿多款甜品嘅吸力，結果都要投降，點都要試番啲。
椰皇雪芭配馬利布甜酒 $98
賣相唔算有咩驚喜，冰鎮椰皇，再將椰子味雪葩（小弟較喜歡用依個葩字，因為有種）填滿椰皇，再以少少椰果點綴吓。味道方面，更無驚喜，只喺椰香味十足，雪葩質感奇怪地比較散，本以為瑪利布椰子甜酒會另上，等客人後加，原來製作時已加入雪葩內，只令椰子味更濃重，心想，唔加個椰子甜酒，效果又會唔會相差不遠呢？
法式香蕉黑糖焦糖燉蛋配黑咖啡 $88
見好多人都將依道甜品放上網，兼且大讚特讚，的確淋啲酒，再點火引發出火光熊熊好有視覺效果，不過，「光輝」過後，味道又喺咪足以「永恆」。由於燉蛋層比較薄，質感頗稀，所以，有種好削身嘅感覺，入口好似水淋淋咁，個人而言唔喺咁鍾意，然而，味道方面，香蕉灑上黑糖，又倒入黑咖啡，清甜甘苦，感覺不俗。
個標題以光怪陸離為題，唔單只因為食字開係，皆因幾道菜都俾小弟一個「光怪陸離」嘅感覺，青檸香茅雞翼無乜青檸香茅味，反而靠森巴醬提味；烤菇配韓式泡菜芝士，以為有韓式泡菜，原來喺得朕韓式泡菜嘅味；青咖喱銀雪魚嘅香料烤米飯，絕得食得出只喺珍珠米而已，何來香料，更唔知烤咗乜；椰皇本身喺椰子味，馬利布喺椰子甜酒，咁嘅配搭究竟想點？多啲椰子味？只好怪自己點菜點得光怪陸離！
個人評分
味道：6/10
環境：8/10
服務：8/10
抵食：6/10
平均每人消費：HK$400
味道：6/10
環境：8/10
服務：8/10
抵食：6/10
平均每人消費：HK$400
餐廳資料：
GreenHouse
銅鑼灣勿地臣街1號時代廣場食通天10樓1004號舖
2383 4022
GreenHouse
銅鑼灣勿地臣街1號時代廣場食通天10樓1004號舖
2383 4022
沒有留言:
發佈留言