Aldou Café：靜靜街角．一個人的晚餐！

經過五日大陸山區工作，無啖好食嘅結果，就喺一返嚟香港就食餐好嘅，今趟經深圳灣口岸過關返港，所以，過關後就坐返專營巴士落元朗，Aldou Cafe喺元朗其中一間想試嘅小店之一，認識佢喺從食友口中推介佢啲咖啡，不過，因為地點問題一直都未有去試。

小店環境，座位唔太多，但黑白格仔地磚，白磚牆，環境都幾舒服，而且，餐廳內有好多少擺設，加上出面喺啲大空地行人路，唔多會見到行人匆匆，所以，多一份悠閒感。

晚市餐牌好簡單，一紙晚餐分前菜及主菜，後面仲有個飲品及甜品餐牌。

雖然無正式晚市套餐供選擇，但可以加$28多配一客餐湯及甜品或餐飲，而甜品唔喺任揀，是日嘅喺意大利芝士餅，小弟本着試佢啲咖啡而嚟，當然，揀飲咖啡啦。餐飲可揀汽水、有機茶、凍果茶，若然選咖啡類，需另加$10，凍咖啡類則加$12。此外，店大家好有性格，唔提供檸檬類或奶茶類飲品。

精選餐湯 $18

是晚嘅餐湯喺粟米忌廉湯，當然唔喺你平常晌屋企飲開嗰啲罐頭粟米湯啦！個忌廉湯嘅粟米味幾濃，頗突出，粟米打得幼細，所以質感挺柔滑。餐包喺小圓法包，烘熱過，暖暖哋嘅包身軟綿帶點煙韌，包面又脆脆哋。

蟹肉南瓜汁意大利飯 $108

賣相精簡，一粒車厘茄，輕炸過，好有趣，而且，對整道菜有個好好嘅點綴；飯粒軟熟，但飯心仍有煙韌感，煮得恰到好處，而且，落南瓜汁好足，飯粒充滿南瓜甜味，而飯內有洋蔥粒及好多冬菇粒，令口感唔單一；此外，另一精彩之處喺啲蟹肉，一啲無手軟，落得好多，有點鹹鮮味，原來遮住咗仲有件蟹鉗肉，咁就睇落更加唔似罐頭蟹肉，而喺即拆貨色。真喺一道好有水準嘅意大利飯，掂呀！

榛子鮮奶咖啡 $35

啲咖啡真喺好好飲，醇香喺好基本，拉花雖然未至好精緻，但拉得唔差，喺個心尖位偏咗少少，最緊要喺撞奶泡真有一手，好平均，完全唔使攪，入口都好均勻，口感柔順，又帶點榛子香，正。題外話，落單時店員問我咖啡喺咪餐後上，我就要求跟主菜同上，其實，依啲都睇得出佢哋服務細心。

餐湯、意大利飯、咖啡，每樣都用心做，晌寧靜嘅街角，晌餐廳嘅一角，滿足晒為食嘅味覺！

個人評分
味道：9/10
環境：8/10
服務：8/10
抵食：8/10
平均每人消費：HK$146

餐廳資料：
Aldou Café
元朗馬田路38號怡豐花園3號地舖
2619 9933