Pink Coffee：紅粉救冰

就喺睇到食友嘅南瓜鮮奶咖啡，吸引小弟到訪一試，南瓜、鮮奶咖啡都喺自己喜歡嘅食材及飲品，兩者走埋一齊，唔知效果又會喺點，朋友就話唔錯，不過，點都要試過先知，話晒人人口味唔同嘛。再者，小弟家住美孚，行都行得到過嚟，唔使專登搵日，就撞日趁今晚無飯開就過嚟試試，食完再行返屋企，極方便。

雖然今日喺星期五晚，出地鐵都仲好多人，但過到嚟 D2 Place就卻喺好靜，3/F開設幾間食肆，間間都唔多人，感覺有少少意外。而餐廳採開放式，一邊售賣區睇晒有咩食物、飲品，另一邊則用餐區，主要喺啲二人、四人枱，全店以原木及深啡為主調，配暖和嘅吊燈，感覺暖意。

如想再舒服啲，就不妨考慮室外嘅露天位，雖然，一望周遭嘅環境，唔會有種峇厘風情嘅感覺，但絕對讓人感覺開揚空曠，心情放鬆。

食物嘅種類，主打喺即煮嘅意大利粉及款式多多嘅三文治，前者每日都有3款供應，而後者按食材不時持續更新；此外，仲有啲沙律、冬甩包、多士、鬆餅……等等。

鋪面有個大招牌，註明當日所用嘅咖啡，並介紹埋佢嘅特性，對咖啡推廣嘅一份承擔表現，但更鍾意喺佢有幫手推廣公平貿易，收銀旁就有紙板介紹咩叫公平貿易，以及售賣一啲公平貿易嘅產品。

飲品則唔使多講，咖啡喺店家強項，熱飲主要喺多款不同嘅咖啡系列，而凍飲方面則有唔同款式嘅品酪冰，當然，仲有其他選項以滿足唔同客人嘅需要。

此外，仲不定期推出新產品，光顧嘅日子就啱啱見佢新出咗幾款抹茶及紫薯嘅新品。

日式咖喱牛肋粒意大利粉 $55

本來每日供應3款意粉，但是晚嚟到就只喺淨番一款。唔緊要，反正日或咖喱我都啱，日式咖喱嘅辣度平易近人，辣中帶甜，而牛肋粒好軟腍，只喺拼埋落意粉度，卻只喺穩陣而缺乏驚喜。順帶一提，所有意粉，加配任何飲品都有減$9優惠！

燒素蔬中東包 $40

外貌有別晌超市見到又圓又扁中空嘅中東包（Pita Bread），反而顯得又長形、又挺身，感覺仲頗似意大利嘅拖鞋包（Ciabatta）。中東包內夾有嘅燒蔬菜包括：三色燈籠椒、茄子、青瓜、露筍、冬菇，既豐富，又健康，麵包亦好鬆軟，但少咗中東包嗰份煙韌感。

南瓜鮮奶咖啡 $44 / Mega

原來，依一款南瓜鮮奶咖啡喺應早前萬聖節推出，不過，節日過後就仍要有售賣，好在喺咁，否則白行一趟。店員話佢哋喺以真正南瓜蓉調配，所以，更要落足力品嚐品嚐！咖啡本身都好綿滑醇香，南瓜嘅味道亦突出，只喺夾埋一齊感覺又有啲怪怪，唔喺咁啱我自己嘅個人口味，仲要叫咗杯Mega添，哈哈！

朱古力忌廉品酪冰 $40 / Grande

品酪冰（Prappenio）真喺好多款式，基本上又細分為咖啡、忌廉、雜果系列，一共有12隻口味，而品酪冰都算喺佢哋嘅招牌飲品。只喺試咗朋友杯嘢嘅一小啖，質感跟星冰樂呀、Smoothie呀差唔多，不過就冰涼透心，將忌廉溝勻落去，其實又真喺幾滑幾香，不失招牌之名。

事後再瀏覽過店方嘅FB，內裡上載咗唔少有意思嘅文章分享，又時刻強調佢哋喺一個平台，讓文化同藝術晌Pink Coffee 醞釀及發酵，然後叫每個到Pink Coffee體驗嘅人都互相表達和交流情感。小弟自詡為偽文中佬，肚內半滴墨水都無，嚟Pink Coffee都喺食吓嘢，同朋友吹吓水，辜負佢哋一番心意。

個人評分
味道：6/10
環境：7/10
服務：8/10
抵食：7/10
平均每人消費：HK$85

餐廳資料：
Pink Coffee
荔枝角長義街9號 D2 Place 3樓305號舖
2362 2323