Crostini Bakery & Cafe：好友狂嚐曲（41）

上一篇「好友狂嚐曲（41）」分享過「第一麵包」嘅唧花牛油曲奇，估唔到隔無耐，又試到另一間店嘅唧花牛油曲奇，就喺晌觀塘紮根，已擴展至全港有十多間分店嘅「Crostini」。食友好有心，因為唔喺咁經常見面，早兩個月就送上生日禮物俾小弟，就喺佢嘅「罐裝曲奇禮盒」。

寶藍色包裝盒，簡單嘅金線屋仔圖案，貫徹一向嘅歐陸風！

其實，Crostini嘅產品唔喺第一次試，晌「好友狂嚐曲（16）」就介紹過佢嘅伯爵茶杏仁曲奇，然而，今次嘅禮盒裝又豈止得一款曲奇。打開包裝罐，內有三大包曲奇產品：雜錦曲奇、蝴碟酥、牛油曲奇，而且，每一包份量都幾多。

雜錦曲奇

叫得雜錦，起碼都有幾款曲奇，包括：松子南瓜籽曲奇、朱古力榛子曲奇、咖啡合桃曲奇、綠茶紅莓曲奇和伯爵茶杏仁曲奇。Crostini嘅曲奇牛油味唔會太重，所以，各款曲奇本身嘅味道都食得出，雖然唔算話好濃好突出；此外，佢啲曲奇好鍾意配堅果類食材，如榛子、合桃、杏仁，口感蠻脆，以求口感搭夠。

蝴碟酥

外形絕對輸蝕晒，因為唔單止粒大粒細，而且，大部份蝴碟形欠奉、酥皮欠層次；入口鬆脆度唔輸蝕，只喺牛油香味好弱，好聽啲就較健康，難聽啲就毫無風味。

牛油曲奇

唧花外觀幾工整，大小都好一致，比起蝴碟酥，製作明顯無咁「求其」。真喺唔知喺咪健康關係，就算牛油曲奇嘅牛油味都算唔上好濃香，叫做OK咁啦，口感就好鬆化。

話時話，Crostini嘅食評都有唔少，但絕大多數都喺講佢嘅件裝凍餅、原個蛋糕，少部份會講吓佢嘅麵包，而提及佢嘅曲奇就寥寥無幾，唔知咁算唔算喺對佢曲奇質素嘅一種啟示呢！

個人評分
味道：6/10
環境：- /10
服務：- /10
抵食：- /10
平均每人消費：HK$0（生日禮品）

餐廳資料：
Crostini Bakery & Cafe
荃灣青山公路398號愉景新城L2層2020號舖
2377 1891