店內以雅致嘅小圓枱為主，配合一啲牆畫，柔和嘅燈光，務求營造出一種悠閒氣息。由於只有極少量方枱可拍埋一齊整合，所以，較合適情侶或兩三人嚟聚聚。不過，地方所限，兼擺放唔少餐枱，整體感覺仲喺覺得有點亂，可能啲枱椅擺位需要執一執，讓感覺好啲，侍應傳菜都流暢啲。
餐牌幾頁大紙印備晒，有餐湯、沙律、主菜、意粉、意大利飯、甜品及飲品，晌銅鑼灣區而言，仲要喺地鋪，定價頗為合理。
飲品方面，一早已瞄定啲果汁類，所以，其他嘅咖啡、朱古力特飲、特色沙冰、精品茶……等等，都喺望兩望，不過，又確喺頗多選擇，而且，甚具特色，好啱貪新鮮，又想試新嘢嘅年輕人。
鮮榨神奇西瓜汁 $35
與其叫鮮榨，不如改為鮮攪，唔單止原個奉客，內裡嘅喺鮮西瓜汁連果蓉，因為原個果肉打成，唔喺單單榨汁，入口帶點清涼，久唔久又啜到果肉，如果再凍啲就更加透心涼，尤其依家都11月中，外邊仲有少少悶熱。
鮮榨神奇菠蘿汁 $55
同樣神奇在於唔喺單單菠蘿汁咁簡單，汁內連埋果蓉，幾鮮甜，一大個原個菠蘿做，份量足好襟飲。不過，缺點喺唔夠凍，見佢大批放入凍櫃雪，不過，菠蘿皮厚，雪凍佢唔容易，不妨考慮放入冰櫃，依家秋涼都勉強可以，夏天如果唔夠凍真喺差好遠。此外，菠蘿面嘅邊皮有啲瘀黑，賣相唔好睇，事後向店方反映，店長話每個神奇菠蘿汁即日鮮榨，菠蘿殼亦唔會翻用，因為製作需時，為應付供應，有少部份會預先做定，所以，可能因此影響外觀，故依點之上需要諗計改善。
鵝肝鴨腿肉牛肝菌意大利飯 $168
今晚最喜愛菜式非依道意大利飯莫屬，飯粒煙韌有咬口，煮得好入味，而且，有少少唔同嘅香料香味，飯內更混有唔少牛肝菌同鴨腿肉，口感非常豐富，至於飯面嘅鵝肝，煎嘅火喉拿捏準繩，油潤甘香，味道豐腴，超正。
北海道珍寶帶子墨魚汁意大利麵 $158
對比個意大利飯，個墨魚汁意大利麵就較為失色啲，其實個麵煮得柔韌度啱啱好，只喺略嫌油咗啲，但最敗筆喺件珍寶帶子煮得過火，失卻應有嘅爽彈口感，咬落比較實淨。無論個意大利飯，抑或個意大利麵，都較外間常見嘅份量多，我哋兩個主菜都夠3個人食，況且，嚟得小甜谷梗要留肚食甜點。
話晒小甜谷都喺做甜品起家，所以，一早已打算留肚試一試佢啲甜品，然而，甜品實在有好多選擇，都要研究一輪先決定到。
蜂巢梳乎窩夫（配新鮮果醬、時令水果及雪糕） $68
佢哋嘅窩夫以脆身為主，喺另一種口感，有別一般外脆內綿嘅情況，所以，其實成件都好脆身，內裡唔綿密，啱唔啱食就視乎個人喜好，唯欠蛋香；新鮮果醬就唔見有，取而代之喺窩夫面上有一小片蜂巢，為個窩夫增一增值，雲呢嗱雪糕球好香滑，榛子碎亦好香脆，只喺奇怪點解一底窩夫會喺三件，唔喺兩件，又唔喺四件，哈哈，忘記搵店員查詢添！
法式梳乎蛋多士配鮮果及雪糕 $58
依道甜品真喺頗得意，篤落去軟軟綿綿真喺幾似梳乎厘，切開又滑滑溜溜咁，蛋味唔喺好重，重質感，配自家製焦糖漿食，其實可加多一、兩款糖漿俾客揀，如朱古力漿、楓糖漿作為增值服選擇。實在覺得得意，所以都請教店長點整，當然佢唔會透露晒俾我知，但大概喺以麵包磚浸透蛋漿再焗，唔怪得名字加上「法式」、「多士」一詞啦！
始終新開張無耐，仲有好多調校空間，但從菜式中，都睇到唔少創意。餐後店長都有問食客嘅意見，我哋都反映咗少少，信相繼續努力，可以做得更好。
個人評分
味道：7/10
環境：8/10
服務：8/10
抵食：7/10
平均每人消費：HK$215
環境：8/10
服務：8/10
抵食：7/10
平均每人消費：HK$215
餐廳資料：
小甜谷 Kaffee
銅鑼灣謝斐道482號信諾環球保險中心地下4-6號舖
2325 0208
銅鑼灣謝斐道482號信諾環球保險中心地下4-6號舖
2325 0208
沒有留言:
發佈留言