山區裡的走走趯趯: 辛安東元祖奶奶雞 Spicy Andong：一二三紅綠櫈，奶奶雞要小辛！

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2014年1月2日星期四

辛安東元祖奶奶雞 Spicy Andong：一二三紅綠櫈，奶奶雞要小辛！

嚟自韓國嘅「辛安東元祖奶奶雞」據講晌亞洲區已有逾200家分店，遍佈韓日、星馬、中台等地，上年8月先至晌香港落戶，首間店舖設於旺角，估唔到事隔數月，已晌銅鑼灣插旗開設新分店，地點就在銅鑼灣地鐵一出對面嘅京都廣場，相當便利。今晚與一班食友同嚟，新知舊雨，齊齊一窺奶奶雞秘技，實在期待。

上到7/F，門口大大個黑底白光店名，加埋「鳥」字餐廳商標，型格搶眼。牆邊仲掛有雜誌、報紙專訪，唔嘥咗啲賣廣告嘅機會。

地方唔算好大，但由於枱椅排得唔算好密，令人覺得寬敞闊落；兼且雖然裝修簡約，但就大玩色彩繽紛，唔單牆身五顏六色，好似電油桶嘅櫈都一樣色澤撞得七彩，紅黃綠好似紅綠燈咁，再加埋牆上唔少韓國海報，韓風十足，甚有個性。不過，初時以為啲電油桶櫈可以打開放袋放背囊，點知原來唔得添。

周圍都五顏六色，甚搶眼！

人多坐圓枱，方便傾偈！

前年年尾去過釜山及濟州旅行（有興趣可以睇睇小弟晌開飯遊蹤嘅「韓冬風遊釜慶濟」之旅），對韓式飲食多咗少少認識，晌度都一如絕大多數韓式餐廳，無暖水、熱水供應，一嚟就嚟樽凍水過你自斟自飲。枱上仲有「重疊疊」嘅鐵筷子、鐵匙羮，最方便喺枱枱有個大骨碗放骨頭放食物碎碎，更貼心就喺有把大較剪，剪肉剪粉都得。服務亦好妥貼，收碟加水都十分到位，而佢哋嘅友善態度確令食客心中留下好印象。

講到食，又點會得「奶奶雞」咁獨沽一味，除咗兩款主打嘅「奶奶雞」之外，種類仲分為冷盤、小食、飯麵、主菜、飲品，最喜歡佢張點菜紙嘅設計，圖文並茂不在話下，佢將各分類以顏色區分，令人更易、更清楚睇到各類別嘅選擇。

韓國果汁碳酸 $18

飲品都有挺多選擇，如玄米漿、原粒提子汁、粒粒雪梨汁、韓國鮮奶果汁、Asahi啤、真露（韓國燒酒）……等等，試咗友人少少嘅玄米漿，感覺幾有趣，奶白色嘅玄米漿入口一朕米飯味，但又唔似粥水咁，感覺輕怡一啲；小弟就前後試咗兩罐韓國果汁碳酸，一罐鳳梨，一罐檸檬，簡單而言就喺有氣果汁，味道唔錯，但唔會有咩多大驚喜，但配食濃味、辛辣食物，我就較鍾意襯啲清爽嘢飲，除此，仲有橙味可揀。

左：玄米漿、中後：韓國鮮奶果汁（蘋果味）、右：韓國果汁碳酸（鳳梨味）。

韓國果汁碳酸，左：檸檬味，右：鳳梨味。

既然「奶奶雞」喺招牌，自不然講講佢嘅滋味先啦。其實一客奶奶雞分半隻或全隻份量，店家亦建議3人以下點半隻，4人或以上先好點全隻，因為奶奶雞唔淨喺有雞件，仲有水晶粉、青瓜、甘筍、薯仔等等，都幾大碟頭下，再者，一啲主要食材都喺由韓國總店天天直達，務求神髓跟晌韓國食到嘅一樣。而且，晌韓國食雞，一般都喺辣同更辣，稍稍迎合香港市場需要，由「無辛」、「小辛」、「中辛」至「激辛」4層辣度級別，所以怕辣嘅人都可以試到佢哋嘅奶奶雞！

辛安東元祖奶奶雞 $128半隻 / $198全隻
由於奶奶雞喺接到落單先做，所以製作需要，要等20-25分鐘左右，據店方介紹，雞隻採用重約1.5kg（約兩斤半）韓國運嚟嘅走地雞烹煮，比起韓國本土用嘅2kg重大雞（約三斤五兩），肉質會相對嫩滑好多。我哋眼前依碟喺半隻份量，但加埋其他配菜，已經有成大碟。雞件食落果然細嫩，墨漆漆嘅醬汁辣中帶甜，濃郁惹味，而雞肉非常入味，好食；要「無辛」好似失咗啲風味，但我哋一班人都唔喺食得辣，所以揀上「小辛」辣度，諗住唔會點辣，因為仲有「中辛」、「激辛」，入口之後先慢慢知佢厲害，到臨尾食啲水晶粉時，水晶粉滲滿醬汁，煙韌滑溜，不過辣度認真唔講得笑，小弟都要灌番啲凍水至得。

釡山鮮蠔奶奶雞 $178半隻 / $258全隻

釡山鮮蠔版本，只喺晌「辛安東元祖奶奶雞」基礎上額外多加入鮮蠔，同樣要半隻雞及小辛。鮮蠔共有4隻，隻隻碩大肉厚，味濃鮮甜，依然香辣惹味。其實，食晒兩碟雞，連同所有配料及水晶粉，可以幾飽肚下。

晌點菜紙上，見到菜名旁邊有「雞」公仔商標，就表示喺廚師捱介，如果無乜心水想食乜，大可以按此作參考。先講講冷盤啦，冷盤一共有7款選擇，單睇菜名都已甚覺特色，而「辣椒」公仔多寡，就概略知其辛辣程度。由於整個菜牌好多嘢我哋都想試，所以冷盤就只揀「膠原蛋白沙律」一樣。

膠原蛋白沙律 $58
以羅馬生菜、車厘茄、紅燈籠椒、洋蔥為沙律底，撈上胡麻醋汁，清爽酸香，晌一片辛辣中成為一道「爽口」清泉。膠原蛋白又喺乜家科？查實喺加入爽口不膩嘅豬手肉而已，配以粗糙石碗盛上，別具雅致。

似乎小食喺大家嘅興趣所在，19款小食我哋就揀嚟當中4款齊品嚐，不過，有食友可大膽，之前都講我哋都無乜邊個食得辣，但都夠膽點上一道有3隻「辣椒」公仔嘅廚師捱介「芝士地獄薄餅」，咁唯有齊齊落地獄試試依個薄餅有幾辛。此外，仲點咗年糕、豚肉及牛肉3款小食。

芝士咖喱年糕 $48
先試嘅小食喺依個年糕，賣相跟點菜紙個樣有少少出入，不過眼前依個以黃色小瓦砵盛載嘅年糕，面層烘得溶溶嘅芝士，賣相更吸引。韓式炒年糕一向都頗啱食，加入咖喱汁，再放芝士焗，真喺「賣飛弗」。年糕煙韌有咬口，咖喱微辣，惜不及印度嘅香，但絲絲芝士嘅補救，整體味道都喺不俗。

冰珀豚肉 $58

名字改得有型，不過悟唔出佢喺乜，不過一睇英文翻譯你就大概知：Steamed Pork with Spicy Garlic Sauce。整碟豚肉被醬汁遮晒，一撥開，登時嘩嘩聲，皆因豚肉肥到無朋友，小弟一向視膽固醇如無物，就由小弟做炮灰先試為快。首先，個蒜汁幾辣，但就幾香，而豚肉以韓國五花腩蒸煮，把肥油逼出，加上腩片切得非常透薄，所以捲上蔥絲、蘸滿辛香醬汁，肥膩感出奇地唔重喎。