Mrs. Fields Cookies：好友狂嚐曲（十二）

唔經唔覺，好友狂嚐曲系列都寫到嚟第十二篇，其實Mrs. Fields差唔多日日都經過，因為小弟返工返中環，港鐵站內就有一間分店，所以經常行過，不過就一直甚少幫襯，反而買咗好幾次佢嘅小食嚟送俾啲食友仔。

眾所周知，佢哋賣嘅喺美式軟心曲奇，即喺大大塊，咬落唔脆，餅心軟軟韌韌，質感非常有趣，而且糖分高牛油重。雖然喺咁，亦都有唔少捧場客。晌店面，佢哋會將一小粒一小粒包好放晌櫃枱前俾人試食，小弟有時行過都會隨心攞粒過吓口癮架，哈哈！

今次唔喺朋友，又唔喺食友所送，喺老細個女醒我哋幾個同事嘅。所以，嚴格嚟講都唔喺太貼題，不過，算啦，被我抽抽水寫埋入「好友狂嚐曲」系列度啦。之但喺，話時話，佢一請就一大盒，雖知Mrs. Fields嘅曲奇本身都唔平，成$13件，所以依盒嘢都成$130架，可是對有錢人而言，碎濕濕啦！

內裡一共有10塊曲奇，分兩款味道：夏威夷果仁粒及朱古力粒。

夏威夷果仁曲奇

入口可以話喺喪甜，真喺甜得有啲無譜，未必人人啱食，不過口感軟腍煙韌，富牛油香味，內裡有唔少大粒夏威夷果仁，真材實料無欺場，所以食落份外有咬口，而且果仁又好香脆。
純朱古力曲奇

真喺睇佢唔出，估佢唔到，反而無咁甜喎，我諗對大部人而言易入口好多，而朱古力粒好濃朱古力味，佈滿晌成塊曲奇身上，所以個人較鍾意依款曲奇，正正啱啱好揀咗兩塊朱古力粒曲奇添。

純朱古力曲奇（左）、夏威夷果仁曲奇（右）。

曲奇加咖啡喺下午茶精彩組合，平時晌公司都喺懶懶哋沖三合一咖啡，剛啱同事從旺角嘅My Little Coffee買咗啲非洲肯亞咖啡，問我有無興趣喎，仲使講咩，加埋杯自家滴漏咖啡，超享受啦！

多謝晒老細個女，亦多謝同事，讓小弟從沉重嘅工作中釋放出嚟一陣，抖抖氣，飲吓咖啡食吓曲奇。

個人評分
味道：8/10
環境：7/10
服務：7/10
抵食：7/10
平均每人消費：HK$39（禮物）

餐廳資料：
Mrs. Fields Cookies
中環港鐵中環站W8號舖
2609 4363