鯉景灣向有蘇豪東之美譽，一個細細嘅鯉景灣，就已有廿多間食肆，西班牙菜、歐陸菜、茶館、土耳其菜、意大利菜、蠔吧、粵菜、德國菜、京川滬菜、港式、泰國菜、日本菜、法國菜、韓國菜、潮洲菜……等等，可以講得應有盡有。依邊跟中環嘅蘇豪感覺很不同，閒日晚上嚟到，感到好寧靜，無晒太喧鬧嘅感覺，偶爾晌度跟三五知已食餐飯，閒聊一晚，飯後沿海濱逛一逛吹吹風，可以從緊張沉澱嘅工作舒緩出嚟。是夜，就跟幾位食友嚟到Jack's Terrazza Ristorante，領略鮮蠔配美酒嘅滋味！
麵包籃
晌未入今晚嘅主題，先嚟個麵包籃等大家熱熱身，意大利香草小圓包，暖暖又軟熟，搽啲牛油，已靜俏俏為今晚「騷蠔」之夜打開序幕！
無論食咩都好，由淡至濃都喺王道，此外，食蠔配咩酒亦大有學問，唔同產地嘅白酒故然味道不同，蠔同樣有唔同特性。小弟對生蠔、餐酒都唔喺咩專家，班門弄斧只會獻醜，只喺拾人牙慧分享一下個人體驗。餐廳提供幾款美酒配生蠔嘅建議，人人喜好唔同，無心得嘅大可跟餐廳建議一試。
除咗上述3支酒之外，今晚仲額外多試了一支南澳洲嘅白酒，依幾款較清甜嘅白酒或清酒，原來配生蠔嘅效果都好唔錯。
Pinot Grigio DOC 2011（意大利白酒）
出羽櫻出羽燦燦純米吟釀酒（日本清酒）
Castellengo Prosecco N.V（意大利白酒）
Milton Park Chardonnay 2011（南澳洲）
幾款白酒酒精濃度都喺11%-12.5%，都易入口，喺枝清酒高啲啲去到15.8%，但小酌一杯半杯都可以。個人較喜歡Castellengo Prosecco N.V，除咗佢喺較低只有11%之外，飲落感覺額外清爽，有點點果香。
今晚，餐廳亦揀嚟5款時令生蠔配此等美酒，又睇睇擦出咩火花先！由淡至濃順序品嚐嘅5款生蠔有：Scottish Oyster、Irish Rock、Australia Coffin Bay、Fine De Claire同Gillardeau，呎吋、形狀、質感、味道都各有特色，但要能夠細緻去辨別佢哋嘅質感及味道，實在唔容易，能一次過品嚐兼領略其固中分別，實在喺一次難得嘅飲食體驗。
Scottish Oyster $50
蘇格蘭蠔每隻約3吋長，較闊身，體形大，肉厚汁多，肉質非常鮮甜，有少少爽脆嘅口感。
Irish Rock $50
依款愛爾蘭石蠔跟蘇格蘭蠔大細差唔少，窄身小許，肉質亦較薄，海水鹹味重啲，好似跟食蘇格蘭蠔差唔多。
Australia Coffin Bay $45
體形跟其他生蠔比，細咗半個碼，每隻約2.5吋長，較圓潤，海水味濃，質感挺爽脆。
Fine De Claire $50
兩款法國蠔都較為大隻，有3.5吋大，其中一款Fine De Claire肉質似乎較實淨，而且咁多款之中應該喺最鹹嘅一款。
Gillardeau $55
另一款法國蠔，海水鹹味過後，蠔味相對較濃，而且肥大肉厚。
人人食嘢嘅感覺都唔同，可能你食出嚟嘅味道跟小弟唔一樣，但最重要都喺可親身體驗。上述幾款蠔都豐滿肥腴、鮮甜味美，而個人而言，就較喜歡海水味淡啲，蠔味悠長啲嘅生蠔，所以，似乎法國蠔Gillardeau合自己喜好。
離開時個蠔吧啲蠔都銷得所剩無幾！
「蠔」情過後，跟住再有一輪「意」戀。以生蠔作為頭盤，之後再有沙律、薄餅、意粉及意大利飯等多款意國美食，最尾又點少得意式甜品呢！
地中海快燒生吞拿魚柳伴火箭菜車厘茄沙津（Insalata Di Rucola Con Tonno Scottato） $138
眼前依份沙津喺店方已幫我哋分好，正式嘅份量又點會咁細份吖，大概喺依份嘅4倍左右。吞拿魚柳雖然炙燒過，但口感跟食魚生無乜分別，只喺外圍蘸滿香草及黑椒碎，鮮味中多份香草及辣味；而帶苦嘅火箭菜以芥末蜜糖汁撈過，甜甜哋，不過，我更鍾意上次晌灣仔店以檸汁、橄欖油及意大利黑醋嘅效果，更清新醇香。
四季芝士薄餅（Quattro Formaggio） $128
上次晌灣仔店未有機會試到大廚做薄餅嘅手勢，今次可以試到實在開心。四季芝士喺廚師推介，當然有一定特色。手搓批底，口感薄脆，用上4款芝士：Gorgonzola、Gruyere、Camembert及Mozzarella，雖然唔喺款款芝士都認識，但放在一齊，芝士烘得份外軟熟之餘，散發嘅香味感覺寧捨香濃。
露筍、雜菌忌廉汁燴意大利飯（Risotto Alla Funghi E Asparagi） $148
上次已試過佢哋啲意大利飯，知道喺高水準之作，所以今次又有意大利飯食，殷切期待。果然，都無令小弟失望，意大利飯煮得濕潤煙韌，雜菌忌廉汁濃濃菌香，黏杰啱啱好，每粒米粒都沾滿汁。
牛肝菌、雜菌、煙火腿蕃茄醬燴尖通粉（Penne Alla Boscaiola） $98
起比個薄餅及意大利飯，個人覺得個尖通粉食落印象無咁深刻，雖然蕃茄醬令尖通粉食落酸香鮮活，又拌有牛肝菌、雜菌、煙火腿等配料，可能醬汁只喺緊緊夠，食起嚟通粉有點點乾身嘅感覺！
意大利雲呢拿朱古力雪糕（Cassata） $58意大利芝士蛋糕（Torta Al Tiramisu） $58今之兩款甜品中，以意大利雲呢拿朱古力雪糕較為好食，因為挺實有質感嘅雲呢拿朱古力雪糕中，加入一啲乾果，有咬口；相反，意大利芝士蛋糕似喺正正從雪櫃拎出嚟，唔單入口冰凍，就連馬卡風芝士及海綿蛋糕部份食落都好似食緊雪糕咁冰凍，實在令人有啲疑問。
鮮味嘅生蠔，再配合美味嘅意菜，就算唔喺與佳人共渡，三五良朋，亦可把酒談天，細味人生！
個人評分
味道：7/10
環境：9/10
服務：8/10
抵食：7/10
平均每人消費：HK$0（試食邀請）
味道：7/10
環境：9/10
服務：8/10
抵食：7/10
平均每人消費：HK$0（試食邀請）
餐廳資料：
Jack's Terrazza Ristorante
西灣河鯉景灣太康街55號A期GA26-31
2885 6728
Jack's Terrazza Ristorante
西灣河鯉景灣太康街55號A期GA26-31
2885 6728
沒有留言:
發佈留言