好日子酒家：團年好日子

年年同兩邊屋企人、親友都有幾餐團年飯，跟住又有團拜，開年，食盆菜，農曆新年前後兩星期特別忙碌，幾日紅假年年都喺四圍走，無得抖。團年飯當中，太太嗰邊嘅都一定坐定定、乖乖食，唔會影相搞咁多嘢，所以，就算食咗幾多好嘢，一律食評欠奉。自己依邊嘅，已經慣晒我嘅「相機先食」，有時仲喺佢哋問番我使唔使影相？影咗未？哈哈！今晚嘅團年飯喺同我直系家人食飯，即喺老父、細佬妹，當然仲有老婆啦。年年同佢哋食團年飯都喺屋村對面間「名豪海鮮酒家」，不過名豪前年中執咗，正所謂一雞死就一雞鳴，同一個鋪位又開番間「好日子酒家」。

對照番兩年前嘅名豪室內環境相，好日子嘅格局變化唔大，喺靠牆一邊多咗啲馬蹄位，靠窗依邊就無乜點變，只喺稍稍裝修，換過啲地氈，改過啲吊燈。但偌大嘅大堂，雖則已喺年廿九，入座率都只得3乘左右，真喺唔知佢平時晚市有幾多客。

因為真喺一年先嚟得嗰一次，唔知佢平日菜式嘅定價，不過，眼前嘅賀年餐牌，亦唔算好貴。有幾款新春套餐，分四人、六人、八人，都喺$538、$888、$1688（無話全包），亦有啲孖寶選擇，由$298-$438。最後我哋點個孖寶，加個老火湯，再拼多一份燒味，兩碟小炒，5餸1湯，白飯任裝，5個人實在好夠食。

 豐料煲靚湯 $98

是晚嘅老火湯喺青紅蘿蔔煲唐排，咪睇佢瓦煲細細，都足以有7、8碗之多，好夠火喉，因為飲落好夠味，老婆又無味精反應，真材實料呀！雖然湯渣另碟上，不過食之無味、棄之可惜咁啫。

脆皮燒腩仔 $88

睇樣幾唔錯，肥瘦相間，之但喺一入口，芝麻皮唔脆，就已經乜都唔使多講！

菠蘿生炒骨 $68

雖然時近過年，佢哋有仲有多款小菜都喺六、七蚊碟。其實生炒骨個味道唔差，酸甜有致唔嗆喉，唯一可惜喺粉漿厚，而且芡汁偏少，所以有啲乾。

上文講過點咗個孖寶，就喺大花尾龍躉二味，一客炒斑球加一客蒸頭腩，賣$298。

翡翠炒斑球
翡翠選上西蘭花，用作擺碟裝飾及色澤襯托都好睇，而炒花尾龍躉斑球大大件，魚味濃，有陣爽脆感，確喺幾好食。

清蒸斑頭腩

至於蒸頭腩，因為始終喺頭腩，肉會無咁多，但質感細膩嫩滑，況且加入薑片、果皮清蒸，味道做得幾好，尤其果皮嘅幽香更吊出龍躉嘅鮮味！

蠔皇花菇扣鵝掌 $98

大花菇唔單止大隻，夠晒厚肉，蠔皇扣過，菇香味濃。不過，鵝掌就差咗啲，色水已唔多對辦，比較色淡，唔多夠入味，令食味打咗折扣！

晚飯完筆，原來仲有南瓜露送，但勢估唔到，煮得幾啱食。入口查實似食緊椰汁西米露，內裡有西米，不過就無椰汁味，而喺南瓜味，兼且有食落有南瓜同蕃薯纖維，唔錯！唔錯！

餸菜嘅水準比較參差，不過，環境及服務就認真唔錯，可能唔喺太多客，所以，侍應有求必應，仲好快手！以上菜式，加埋茶錢每位收$10，白飯每碗$10，連加一，5個人食咗八百幾蚊，以街坊酒樓而言唔叫得平，但一年一次，都喺想同屋企人坐得舒服，食得輕鬆啫！

個人評分
味道：6/10
環境：7/10
服務：8/10
抵食：6/10
平均每人消費：HK$163

餐廳資料：
好日子酒家
石硤尾南昌街223-227號名都廣場地下至3樓
2362 9868