Gino's Gelato：糕下立見（上）

甚少山長水遠走到入嚟赤柱，事緣老婆教會一年一度大旅行，今趟喺南區遊，其中一站就喺赤柱。其實對赤柱嘅興趣唔大，既來之，則安之，由赤柱廣場行到去赤柱正灘，再行入去赤柱軍人墳場，跟住回頭返赤柱廣場，個零鐘頭自由時間就當喺行山。結果，就晌依度前後試咗兩間雪糕店：Gino's Gelato及Häagen-Dazs，先寫Gino's Gelato，而Häagen-Dazs就另文再分享。

店內鋪仔細細，都喺得幾個位，不過，都預咗買完拎住食。

價錢跟一般雪糕專門店差不多，一球$32，兩球$52，三球$68，而個窩夫筒另收$7。此外，店內仲有其他產品出售，如絲慕昔、咖啡或茶、雪糕新地。

先檢視一下個雪糕櫃，選擇相當之多，一共有24款口味，個別味道都幾有趣，但就唔會有咩騎呢味道，普遍嚟講都算喺大路。大可先試幾款心水口味，然後再作決定。睇其他食評話啲服務態度麻麻，可能我哋好彩啩，又無乜嘢喎，無話好，亦無話差咁囉。

Gino's所賣嘅都喺標榜正宗嘅家製意大利雪糕（Gelato），即喺脂肪含量比傳統雪糕低，而我哋揀咗野莓乳酪（Wildberries Yoghurt），相信就更加健康。基本上整球雪糕都喺乳酪原味，酸酸甜甜咁，味道頗濃郁，質感挺香滑，不過，野莓實在佔得好少。而窩夫筒新鮮焗製，都幾香幾脆。

雖然，只喺買咗一球兩公婆食，份量亦比起Häagen-Dazs賣嘅為少，喺就喺唔多夠喉，不過，志在試一試，反正都仲晌Häagen-Dazs另外再買。

個人評分
味道：7/10
環境：6/10
服務：6/10
抵食：6/10
平均每人消費：HK$39

餐廳資料：
Gino's Gelato
赤柱赤柱廣場地下5號舖
2899 0314