回家途中例經美孚地鐵嘅鴻福堂，故此，就順道睇睇佢賀年糕點有咩出品。一共出咗5款糕，包括：金腿瑤柱蘿蔔糕（正價$160，優惠價$94）、燕窩楊枝甘露糕（正價$160，優惠價$94）、鴻運年糕（正價$126，優惠價$74）、桂花椰汁馬蹄糕（正價$139，優惠價$82）、紫香瑤柱芋頭糕（正價$139，優惠價$82），如果喺會員，就仲要平啲啲。除咗個燕窩楊枝甘露糕淨重700克外，其餘各款都喺淨重量750克。
鴻福堂美孚地鐵分店
金腿瑤柱蘿蔔糕（優惠價$94）
每款糕除以透明膠盒盛載之外，仲加以真空包裝，令人感覺非常衛生。個蘿蔔糕無論糕面，抑或糕心，都落料無手緊，有金華火腿、臘腸、臘肉、瑤柱、蝦米，此外，蘿蔔糕內亦加有原粒蘿蔔粒，可謂材料十足，味道嘅調校亦都唔錯。之但喺，煎過嘅蘿蔔糕，質感仍有少少削，否則，都幾理想！
成份說明
燕窩楊枝甘露糕（優惠價$94）
講到個楊枝甘露糕真喺鬧出咗個笑話，事緣大家收到啲糕，下意識都喺熱食，諗住佢都好似馬蹄糕一類甜糕，唔喺蒸熱就煎番佢食，結果有親友率先「賴嘢」，蒸完變成一攤水，睇番盒底先知喺凍食，好似馬豆糕、桂花糕咁，即時whatsapp家族群組通風報信，結果我估佢一家當糖水咁食囉，好彩我先食底蘿蔔糕，隔幾日先食依個楊枝甘露糕，幸免於難啫。
翻睇盒底說明，確喺寫明：「此產品可即時食用，無需加熱」，不過，真喺完全無諗過。此外，仲有一點讓小弟好在意，就喺「燕窩」二字，九十幾蚊盒嘢，會俾到幾多燕窩你食？但睇完成份說明，真喺好令人莫名其妙，原來一啲燕窩成份都無，何解叫「燕窩」楊枝甘露糕？
成份說明
撇開上述嘅問題，單單論及個楊枝甘露糕嘅味道，其實一啲都唔差，幾香芒果味，又有好多柚肉，加上海藻水晶珠，整體口感不俗，比布甸嘅質感挺身啲，但又唔會硬實實。由於我當佢布甸咁食，加埋花奶，就更加正！
鴻福堂嘅各款糕點，不單強調香港製造，更註明無添加，但就正如佢啲宣傳牌，只限防腐劑及味精無添加，因為睇番兩款糕嘅成份，都加入咗一啲化學成份，如個蘿蔔糕有甚麼護色劑，楊枝甘露糕又有甚麼酸度調節劑、穩定劑，時下嘅商家都經常濫用「無添加」一詞。此外，既然無任何燕窩成份，就咪鬼叫「燕窩」楊枝甘露糕啦，唔通大菜扮燕窩？想令啲名叫得好聽啲、應節啲，金玉楊枝甘露糕或富貴楊枝甘露糕都唔錯吖！
個人評分
味道：6/10
環境：6/10
服務：6/10
抵食：7/10
平均每人消費：HK$0（禮物）
味道：6/10
環境：6/10
服務：6/10
抵食：7/10
平均每人消費：HK$0（禮物）
餐廳資料：
鴻福堂 Hung Fook Tong
美孚港鐵美孚站11號舖
2370 0330
鴻福堂 Hung Fook Tong
美孚港鐵美孚站11號舖
2370 0330
沒有留言:
發佈留言