翠河餐廳 Green River Restaurant：自討沒翠

晌美孚區，又多咗一間茶記進註，就喺連鎖店嘅「翠河」。其實間嘢都開咗一段日子，但就一直懶得行過去試，因為離屋企距離遠，啱啱一頭一尾。不過，總有機會嘅，就趁一次返完教會，老友揸車直接返嚟美孚，咁就索性建議嚟試翠河。

對比起前身嘅鴻福，翠河當然有朝氣好多，門面招牌霓虹光管綠字，已經寧舍搶眼，而且又喺新裝修，份外新淨。室內環境，以卡位居多，裝修時尚明淨，光猛企理，感覺舒服得多。

有幾款套餐餐牌，都喺以「是日精選」最實惠。由A-K共9款選擇，有無留意，佢唔喺叫咩午市套餐，因為由午市，到下午茶，及至晚市都有供應，只喺價錢上嘅分別。午市時段（11:00am-2:00pm）賣$40，下午茶時段（2:00pm-6:30pm）賣$35，晚市時段（6:30pm後）再次賣番$40，而套餐只包例湯或熱飲。

此外，仲有啲常餐（$38）、馬來咖喱餐（$45-$52）可揀！其他餐牌就無特別去留意。

A款 - 什錦炒河粉

份量超大碟，橢圓形長碟堆滿河粉，兩個女生都夠食。單睇賣相，河粉炒得唔太「勻巡」，所謂「什錦」，都只不過喺啲肉片、火腿、銀芽，炒埋一堆加個茨汁，朋友話好普通。

D款 – 芝士焗肉醬意粉

小弟都好耐無食過依款意粉，所以點嚟一試其手勢，因焗製需時，所以焗意粉要多等候十零分鐘，但可能客多關係，結果等咗近廿分鐘。不過，明顯個焗肉醬意粉有少少焗過火，面層肉醬有啲燶，慶幸唔嚴重。同樣，滿滿放滿一碟，好大份，肉醬本身其實都做得唔錯，芝士軟綿濃香，意粉就不過不失，算OK囉。

K款 – 油鴨脾飯

朋友嘅油鴨脾飯，好好哋斬好嘅一隻油鴨脾，竟然咁求其放番晌碟飯度，唔知喺師傅忙做到無氣抖發「脾四」，定抑或啲侍應跌過嚟再執番，希望唔喺後者，或者我哋諗多咗。據朋友講，件睥比較乾，唔喺好夠油潤，但肉質挺結實，甚有臘味香。

套餐包例湯或熱飲，都喺熱奶茶最穩膽。茶底醇香，姑勿論喺咪心理作用，黑白奶沖出嚟嘅奶茶確然幼滑啲，一杯醒神奶茶作結，算喺精神上嘅一種補足！

雖然口口聲聲話懶得由屋企行過嚟，食完晏咪又要死死地氣行返去。食飽飯，行吓好，個人無咁易肥！不過，被朋友串：你曉肥咩（因為小弟食極都鋼條身形）！真喺自討沒趣。

個人評分
味道：6/10
環境：7/10
服務：6/10
抵食：7/10
平均每人消費：HK$40

餐廳資料：
翠河餐廳 Green River Restaurant
美孚美孚新村4期百老匯街69-119號地下101A舖
2370 2908