素年 The Park by Years：細「素」滋味

老婆生日飯，最頭痛喺搵啲啱去食嘅餐廳，其實 佢對食嘅要求唔太高，唔需要好貴好奢華，但最緊要喺合佢心水、啱佢口味，由於佢喺偏素，所以範圍喺收窄咗少少，不過出面好多素食餐廳水準參差，搵吓搵吓，以前曾經講過話試「素年」，但隔咗數年都未幫襯過「素年」，今晚卒之嚟一試。

穩陣起見，都喺訂咗枱先。深水埗有兩間「素年」，福榮街嗰間經常爆滿，相反，喺汝州街呢間入座率唔高，成晚所見就算唔訂枱，直接嚟到都有枱。對於餐廳嘅環境，感覺幾好，因為裝修簡約，一室淺木色系，樓底夠高，空間感十足。

我哋被安排坐晌入面嘅區域，相對較門口嘅會比較好啲，因為，啲凳有得挨，坐落比較舒服。不過，喺嫌枱與枱之間太近，基本上隔離枱講乜，唔想聽都聚到。

咁「素年」打正旗號主打素食，所以，基本上樣樣嘢都啱老婆。睇一睇其實選擇都幾多，揀選主食有指定飲品附送，如果兩款都唔啱飲，可以揀 其他飲品，有$12折扣優惠。

日本三文魚照燒豆腐蕎麥麵定食 $158
呢個定食貫徹日本菜嘅精緻，睇見成份定食都開心，裏面所包嘅食物好豐富，以12點位順時針講起，有醬燒茄子、蘿蔔漬、素三文魚、照燒豆腐、南瓜煮、西瓜及蕎麥麵配自家製昆布冷麵汁。

每樣嘢都好啱老婆口味，而個別食材又好有驚喜，好似茄子咁，喺冷盤嚟，茄子肉有入口即化嘅口感，三文魚真喺幾可亂真，實際應該喺蒟蒻所做，豆腐質感亦好特別，實淨得嚟又好嫩，而南瓜超粉甜，蕎麥麵嘅昆布冷麵汁好清爽。

沙爹串燒羊肉串豆卜天貝飯配手抓餅 $138
小弟一向鐘意食羊，就算素羊都想試吓，我呢份菜式都都好大堆頭架，睇個菜式名你就知包咗啲乜嘢，就喺素羊肉、豆卜、天貝，都做成串燒形式。唔好睇啲飯好似唔多，搭埋啲手抓餅其實食到好飽。

啲素羊肉好唔錯喎，當然，騷味就無喇，不過，口感真喺幾似肉，最正就喺個沙嗲汁，做得好香濃，配羊肉、配飯、配手抓餅都喺一流；串豆卜叫做OK啦，雖然有豆香，但個人覺得比較乾身啲，而天貝都喺第一次食，究竟係乜？其實嚟自印尼嘅一種豆製發酵食品，咬落口感比較紮實，有點豆香，上網睇原來都喺好有營養價值嘅食品嚟。

奇異果羽衣甘藍蘋果燕麥奶 +$38、京都宇治玄米茶
本來想試「香蕉合桃焙茶燕麥奶」，覺得好特別，不過就話賣晒，改改試一試「奇異果羽衣甘藍蘋果燕麥奶」。一身淺青綠，入口蘋果味佔重，微微酸香嘅奇異果味，可能羽衣甘藍落得唔太多，所以，無話一種好「草青味」嘅感覺，而質感唔會太杰身，奶味唔太重，相信燕麥奶佔比亦唔太多，整體嚟講幾清爽。老婆所揀嘅玄米茶亦好幽香，入口好舒服。

食物嘅款式確喺幾有亮點，配搭見心思，亦感受到食物用料有要求，整體服務唔錯，啲店員好有禮貌，上菜速度亦比預期快。不過，呢度只收現金同八達通，晌呢個唔多帶現金嘅年代，就有啲唔方便，話晒張八達通未必夠錢埋到張幾百蚊嘅單。

個人評分
味道：9/10
環境：7/10
服務：8/10
抵食：8/10
平均每人消費：HK$184

餐廳資料：
素年 The Park by Years
地址：深水埗汝州街132號地舖
電話：5336 4000