肯德基家鄉雞 (KFC) Kentucky Fried Chicken：我的星期六美孚早餐 – 製作算誠「肯」

又喺趁星期六無乜特別嘢搞，兩公婆就一於食完個早餐上馬騮山行轉短山，兜一兜九龍接收水塘、石梨貝水塘，再穿埋九龍水塘落返美孚。本來過到嚟曼克頓山想食「意樂」嘅，但睇見KFC門口嘅早餐介紹，個豐盛全餐頗吸引，所以轉場。

環境一眼睇晒，快餐店模式，不過，啲枱櫈真喺分得好開，加上星期六晨朝早，客人唔多，所以坐得更加輕鬆自在。

食物選擇喺晒收銀後嘅電子顯示屏，KFC主打就喺炸雞，咁早餐方面都有幾款配有炸雞嘅早餐，此外，就喺一啲包餐同扭扭粉餐。

W1. 醬燒雞扒蕃茄濃湯扭扭粉餐 32
老婆就最鍾意蕃茄湯底粉麵，配上扭扭粉就更啱佢。因為佢呢個餐扭扭粉喺主食，所以，佢唔似我個扭扭粉咁，比我嘅大兩倍有多，另一個唔同就喺佢塊雞扒喺煎嘅，我塊喺炸嘅，佢就話幾嫩滑，不過，醃得有少少偏鹹，幸好啲扭扭粉煮得剛好，仲有少少咬口感，個蕃茄湯底都算濃郁，交足貨啦。

C1. 家鄉雞扒扭扭粉豐盛全餐 $39

我就多心少少 ，揀過豐盛全餐，計落真喺抵，除咗有一客細碗裝嘅蕃茄湯扭扭粉之外，仲有香蜜鬆餅、炒滑蛋、香腸同原味炸雞扒，不過，啲洋蔥汁淋落啲雞扒度就唔喺咁好，整腍咗層脆雞皮，但味道就仍然唔錯，炒蛋幾嫩滑，香腸唔喺平價貨，而個鬆餅好香脆，確喺有少少蜜糖香。

熱咖啡、熱檸水

快餐店，都喺無乜嘢揀，求求其其咖啡、檸水，咁其實KFC啲咖啡又唔喺差喎，話晒都喺即磨貨色架。

好耐無寫過呢個系列，話晒晌美孚嘅餐廳食早餐都八八九九，有啲成日食無咩特別就費事寫，有啲新店普普通通又無興趣試，今次KFC有少少賣點，令我哋即時轉場，就寫番篇啦。

個人評分
味道：8/10
環境：7/10
服務：7/10
抵食：9/10
平均每人消費：HK$36

餐廳資料：
肯德基家鄉雞 (KFC) Kentucky Fried Chicken
地址：美孚寶輪街1號曼克頓山商場(曼坊)1樓102-103及105A號舖
電話：2551 6192