金鳳大餐廳 Golden Phoenix Restaurant：「金」非昔比？

老婆一向食嘢喺偏素，偶爾食吓肉，不過，佢有體重過輕嘅問題，所以，家下要食番多少少肉，故此，今回佢就請我嚟「金鳳」鋸扒，認真難得，食完趁天氣涼涼哋順便去行吓山，減番啲卡路里。

雖然過咗午市嘅最高峰，但都要等一等位，不過都喺三幾分鐘有得入。話時話，「金鳳」粗略估計小弟都應該有超過10年無幫襯過，呢間店都幾大，樓底又高，又有一排落地玻璃大窗，裝修就如懷式嘅豉油西餐廳嘅格局，感覺都幾舒服。

牆上嘅霓虹燈數字「1969」，就喺餐廳成立嘅日子，即喺開咗超過半個世紀，主餐牌都有詳細介紹。今時今日，老店已經買少見少，屹立咁多年實在唔容易。

值得一提嘅喺，啲地方無用到盡，枱櫈唔似茶記咁排到「密質質」，而且，亦盡量間開啲客人，好似我哋兩公婆同另一對客人，就安排坐晌張6人枱，中間就隔開咗一個位。

午市方面，午市套餐嘅選擇唔多，只有4款，其中3款喺西式碟頭，平少少，定價$68-$82，淨番1款就喺招牌嘅鐵板扒餐，賣$138。

幾款午市套餐老婆都麻麻地啱食，所以，就喺主餐牌度落手，有好多款鐵板餐供應，可謂各適其適，此外，散點嘢仲有沙律、湯品、小食、海鮮。 全部餐都會牛油餐包、餐湯同飲品、凍飲亦唔需要額外加錢，但就需收加一服務費。

餐具、紙巾都放喺枱側，平常喺茶記都會放少少調味料，呢度唯一嘅調味就喺支大茄汁，因為嚟得呢度大部分人都食鐵扒餐，梗附送大量薯條，所以，茄汁喺必備調味料。

牛油餐包、餐湯
呢一類小餐包喺港式西餐廳嘅經典，包身非常之軟熟，搽上少少牛油都好好食。餐湯可以揀羅宋湯或洋蔥粟米忌廉湯，我哋兩個人各叫一款試試 ，似乎羅宋湯好飲好多，比較有味道，酸香又多雜菜，而個忌廉湯味道較淡，亦都比較寡，粟米粒更喺寥寥可數。

歐陸鐵板餐 $138

上咗個餐湯無耐，都未飲夠1/4，就嚟個個鐵板，明顯喺因為午餐，較多人叫，完全喺整定晒。個餐寫明包咗豬扒、牛扒、法蘭克福腸、澳洲帶子，不過就唔會問你牛扒要幾成熟，亦唔會知喺咩部份，但確喺份量十足，堆到成個山咁。整體嚟講，以鋸扒而言，喺抵食嘅，不過，計埋味道就差咗少少，豬扒、牛扒調味都有少少過鹹，個黑椒汁亦都偏鹹，我啲牛部有份就較多筋，而帶子就算喺雪藏貨，算彈牙好食喎。

招牌牛柳餐 $142
老婆嘅牛柳餐，又喺一大堆頭，有好多件，仲好厚身，落單時亦有問佢要幾成熟，選上7乘，都確喺煎到差不多。不過好搞笑，當淋上洋蔥汁時，塊鐵板無乜點響，只喺滋滋幾聲就完。講到啲牛柳，又真喺幾嫩滑，輕易就切得開，咬落軟腍鬆化，又幾有肉香，因為份量多，老婆食咗一半都叫飽，而下面墊有大量薯菜，不過，啲薯條咁樣墊底，被啲醬汁浸腍晒，有啲嘥料啫。

熱咖啡、熱唂咕+$5

餐後一杯咖啡就啱我心水，而難得有唂咕供應，老婆就寧願加錢飲杯唂咕，比起朱古力味道更濃、更香。

食得我哋兩個鬼咁飽，好彩預咗食完去行轉兩個鐘嘅短山，幫助消化，否則，真喺撐住肚皮返屋企，哈哈！

個人評分
味道：7/10
環境：8/10
服務：6/10
抵食：8/10
平均每人消費：HK$157

餐廳資料：
金鳳大餐廳 Golden Phoenix Restaurant
地址：荃灣青山公路 - 荃灣段388號中染大廈(8咪半)地下G01號舖
電話：2311 2800