Cantina：尋味意「食堂」

平常都比較少嚟「大館」呢度食嘢，但最近約咗位舊舊舊同學食晏，呢位舊同學都算好老友，當然要好好招呼食餐好啦，又想搵個地方好坐啲，方便傾偈，所以，揀咗嚟「大館」嘅意大利餐廳「Cantina」。

唔使多介紹，都知「大館」喺以前中環警署活化後嘅歷史建築，裡面本身就充滿英式維多利亞設計，所以，走進入餐廳，猶如置身歐洲嘅宮廷式餐廳之內，裝修高雅有格調，天花嘅大吊燈夠晒氣派而不俗氣，如果晚上嚟嘅相信更具情調，氣氛更浪漫。

除咗地方大，樓底高，因為嚟用餐嘅人都係附近上班族，較斯文，所以，環境非常清靜，用餐感覺好舒服、清幽。

午市套餐就分為兩道菜（$278 ）、三道菜（$348）、四道菜（$428）嘅選擇，客人可以晌前菜、意粉、主食、甜品中自由組合，彈性頗大。

麵包籃

嚴格嚟講，呢個唔可以叫麵包籃，而喺麵包「袋」，哈哈！雖然無我最鍾意食嘅意大利香草包，不過，兩款麵包：酸種包同麵包條，都好啱食，沾上醇厚嘅意大利橄欖油同黑醋，食味份外地道。

卡布野生蘑菇湯

何謂「卡布」，其實你睇睇英文菜名就知，就喺用咗意大利泡沫咖啡嘅意思，打咗輕柔嘅泡泡喺蘑菇湯上面。舊同學就話個湯嘅菌香嚟得非常之濃郁，飲得出真材實料無欺場，而且，口感柔滑，絕對喺用心製作嘅出品。

Cantina雞肉凱撒沙律

小弟就健康啲，揀返個沙律食吓，開開胃。凱撒沙律一向喺意大利菜中嘅經典之一，看似簡單其實都好多功夫。入口羅馬生菜好爽脆，加咗啲櫻桃蘿蔔，睇起嚟就更靚仔。最正就梗喺加咗好多 雞肉同埋刨咗好多大大片嘅巴馬臣芝士啦，令到味道更豐厚好食。

燒豬肉貝殼粉配意式牛肉茴香香腸肉醬
肉醬意粉又喺意大利菜嘅另一經典，所以，就揀咗呢一道貝殼粉，其實撈埋一齊之後，都分唔到邊啲係燒豬肉，邊啲喺牛肉，邊啲喺香腸肉醬，總之混埋一齊食，味道好濃香，又有唔同嘅口感 ，啖啖回味，而手工做嘅貝殼粉 煮得口感啱啱好 ，口感煙韌，咬落有韌勁，掛滿肉醬，味道一流。

香煎鱸魚柳配菠菜及藏紅花醬

另一道煎鱸魚柳又喺睇起上嚟好簡單，不過食得出大廚嘅手勢，因為魚柳煎到恰到好處，外皮非常之香脆，肉質嫩滑到不得了，老套啲講句，堅喺魚有魚味，魚味濃郁，而墊晌下面嘅菠菜，色澤翠綠，去走晒啲莖位，非常之柔嫩。

意大利芝士蛋糕
我哋兩個都鍾意食甜品，當然第三道菜嘅梗喺揀甜點啦，餐牌中啱啱好提供兩款甜點，正正可以試晒。雖然提拉米素可以揀開心果、榛子 ，但我哋都喺想試番經典嘅原味。底層嘅蛋糕吸滿咖啡酒，濕潤芳香，中間嘅馬卡風芝士非常之柔滑， 面頭灑滿唂咕粉，有濃濃朱古力香，果然喺經典。

特倫蒂諾蘇卷

另一款甜品真喺唔認識，所以，就更加有期待。捧到出嚟佢賣相好特別，面頭放滿好似「飛佬皮」嘅薄脆，撥開之後就見到蘋果、梨肉、葡萄乾，仲有松子仁砌成嘅果塔，面頭唧咗少少忌廉做點綴，令賣相更好睇。入口啲果肉暖暖哋，好清甜，又有陣陣肉桂香，好食。

Cantina店名原來晌意大利文意思喺「食堂」，而據店員介紹，餐廳嘅位置正正就喺以前中環警署嘅食堂，相信喺指俾啲高級警官用餐嗰啲。講到服務，不得不大讚，真喺好熨貼，好有禮，好多細節位都做到一絲不苟。

味道：9/10
環境：9/10
服務：9/10
抵食：9/10
平均每人消費：HK$383

餐廳資料：
Cantina
地址：中環荷李活道10號大館1座1樓
電話：2848 3000