臻.茶 Fantastic Tea：乏人問「臻」

同老婆晌荃灣食完晏晝，再直接起步行轉短山，最後落返「綠楊」， 見到呢間「臻・茶」唔太多人排，又可以用Openrice Pay，而我仲有少少Openrice Point，一於用埋佢，請老婆飲杯「百香果茶」。

鋪側嘅彩色燈箱，有晒餐廳嘅所有出品，或者晌收銀旁亦有整張餐牌，分為傳統奶茶、黑糖系列、邪惡系列、本店限定、芝士系列、梳打系列、季節限定、爽爽系列、水果茶系列及及熱飲。

此外仲有啲優惠產品嘅推廣，比正價平幾蚊。

我埋到去落單嘅時候講話想扣Openrice Point，個店員堅持要我自己用Openrice個Apps落單，但個Apps會自設自取外賣會遲10-15min。但等等下都唔對路，見好多現場落單嘅人都有得攞，我就埋去問問，佢哋只會做咗現場落單嘅客先，Apps落單會排到後面先做，真喺唔知喺店家嘅問題，定喺Openrice嘅問題。

滿杯百香果 $30

就番老婆喜好，揀咗少冰、半糖，目測所見，睇店員沖嘅時候，落百香果漿都唔知有無杯量嘅1/10，所以，百香果嘅酸爽味好弱，有失滿杯之名，就算加咗半粒青檸，因為晌杯內浮浮沉沉，都幾難篤，所以，唔會太易飲到青檸嘅清香，基本上喺有少少近乎純茶一杯。

第一次接觸呢個品牌，由服務到飲品，感覺真喺麻麻地唔好。當然今次只喺試咗佢哋一杯百香果茶，不足以代表所有出品，但就足以令我唔會幫襯第二次啫！

個人評分
味道：5/10
環境：6/10
服務：3/10
抵食：4/10
平均每人消費：HK$30

臻.茶 Fantastic Tea
地址：荃灣蕙荃路22-66號綠楊坊LG樓G20-G21號舖
電話：5404 3857