百份百餐廳 Cafe 100%：上到山頂搵啖食

星期六通常都同老婆出去食早餐，有時天氣好嘅話都順便行埋山，今朝早見天氣一般般，唔太好亦唔太差，穩穩陣陣起見，就唔入馬騮山，由美孚行上「華景」，食個早餐再行另一邊山路落返美孚， 而上到「華景」餐廳就喺得呢間「百分百」。

呢度都嚟過好幾次食晏或下午茶，環境就唔多講啦，總之地方算幾大，座位闊落，同埋客人真喺唔多，有嘅都喺「華景」啲街坊客，相信區外客都冇乜幾個。

早餐餐牌，兩大版，都有幾多唔同類別嘅選擇，其實都喺大同小異，定價跟同一般茶記相約。

老規矩，枱側抽櫃放晒所有餐具、基本調味料，放得整齊，想要熱水就要出去自己斟。

蕃茄濃湯通粉麵餐 $37

老婆一睇早餐選項二話不說就喺揀蕃茄濃湯系列，可以揀兩款餸料，佢就要餐肉、熟蛋，揀食通粉，都幾大碗吓，而且，唔好睇以為得幾嚿餐肉，原來沉咗底，都有幾多。個湯都唔錯，幾夠蕃茄香味，酸酸香香，飲落醒神，啲通粉亦煮得啱啱好。

沙嗲牛肉即食麵餐 $39
小弟嘅即食麵餐就可以揀多一款餸，已有沙嗲牛肉，所以，揀半焗流心蛋，隻蛋確喺煎得好靚仔，篤穿個蛋黃用嚟撈麵食就最正。個湯底喺一般嘅清雞湯，但溝埋啲沙嗲汁又幾唔錯，而牛肉又幾腍滑，啲麵都OK，所以，整體嚟講都收貨架喇。

熱咖啡、熱檸水

佢哋呢度啲即磨咖啡確喺幾香，所以，都喺揀番飲熱咖啡就最穩陣，另外，佢哋沖熱檸水喺用上冷壓嘅檸檬汁，可以講有好有唔好啦，我就較鍾意一片片嘅檸檬自己篤，因為可以控制個酸度囉。

今餐食到飽飽再落山，而天氣保持住陰陰涼涼，又仲未落雨，感覺非常舒服。

個人評分
味道：8/10
環境：8/10
服務：7/10
抵食：8/10
平均每人消費：HK$38

餐廳資料：
百份百餐廳 Cafe 100%
地址：葵涌華景山路9號華景山莊華景商場地下20號舖
電話：2574 8100