上海萬家村小館 Shanghai Man Ka Chuen Restaurant：早鳥晚餐附「家」值

同朋友做完運動，當然要食下嘢補充返啦，落到深水埗福榮街、福華街一帶，完全喺深水埗食街，選擇多到不得了，咁老友想食上海嘢，即時就諗起「萬家村」。襯住未過6:00pm，仲可以點到下午茶餐，咁就快快手搵個位坐低點餐先。

佢哋喺深水埗屹立好多年㗎喇，由斜對面街鋪搬到嚟呢個舖位，地方更大，樓底又高啲，裝修就好似大部分中式小店咁，算得上叫幾雅緻。

佢哋嘅主餐牌一大本，有好多頁，圖文並茂，但比較難影，不過臨走埋單時見到有啲單張攞，所以，掃描出嚟俾大家當有個參考，整體啲價錢合理，又無加一喎，怪唔之得枕住咁多街坊幫襯。

前文都講過我哋趕得切嗌下午茶餐，所以，影出嚟等大家睇睇有咩選擇，當中嘅炒粉麵套餐或湯麵套餐，好抵食吓，因為包一款小食及飲品，而 點心精選餐就平啲，輕怡啲，不過只包一客飲品，感覺好似無咁划算。

酸辣湯 $38
因為啲下午茶餐確喺好抵食吓，所以，額外點個酸辣湯，諗住過過口癮，點知「位上」嘅份量估唔到都咁大碗，夠分3個碗仔，而且，裏面好足料，有唔同口感，酸酸辣辣夠晒味道，真喺超抵飲。

手拍青瓜、四喜烤麩
我哋點咗兩客粉麵餐、一客點心餐，所以，有兩個自選小食。雖然細細碟，但兩款小食都堆到滿滿，份量唔算少。而青瓜好爽脆，濃濃蒜香並帶有辣勁，烤麩軟腍煙煙韌，吸滿晒醬汁，同樣好食。

豆漿、可樂

包飲品都喺啲汽水、罐裝茶，最健康就喺豆漿，而且，阿姐話豆漿喺自家製，無添加，入口豆味濃郁，又夠冰涼，飲幾啖真喺爽晒。

鮮肉生煎包 $43
啲生煎包新鮮製作，固然好食好多啦，實際上啲生煎包放入口，真喺勁熨口，所以都要攤返陣。包身好軟熟，咬落唔黏牙，包底煎得脆口，而豬肉餡好鮮甜，鬆化又富肉汁。

回鍋肉粗炒 $52

上海菜嘅特點就喺濃油赤醬，呢個粗炒就突顯出上海菜嘅精髓中，食落非常之惹味，又濃又香，而麵條咬落有韌勁，回鍋肉切得薄薄一片，唔太肥，好軟熟爽滑。

花雕醉雞麵 $55
湯麵可以揀上湯、擔擔同酸菜湯，揀上通清清哋，唔好睇啲拉麵好似好少咁，其實，喺個碗大顯得佢少，實際又喺分到幾碗仔；但最意外嘅就喺啲花雕醉雞唔喺得三幾件，喺一大碟，仲要好好食，雞皮好爽滑，皮下脂肪少，肉質鮮嫩，嗰陣陣酒香味順口突出，呢個被我哋定為今日嘅最佳之選。

高力豆沙（6隻）$ 68

仲可以叫到下午茶餐，已經食平咗好多，所以，臨尾一於加個高力豆沙，嗌夠6隻份量，大家開心「些牙」吓。高力豆沙亦喺即叫即制，所以，嚟到又喺熱焫焫，個個都好軟熟，裏面嘅豆沙餡好清甜軟綿，所以，份外好食！

我哋食咗無耐，就進入晚市，所以，順手擺埋晚市客飯套餐嘅餐牌俾大家參考，選擇非常之多，耳熟能詳嘅上海菜式都有。

佢哋啲嘢真喺好抵食，尤其下午茶時段，所以，有唔少客人幫襯。啲阿姐招呼又好，無咁忙嘅時候久唔久又同啲客人吹吓水，打牙骹，氣氛和諧，最緊要就梗喺啲嘢好食啦。

味道：8/10
環境：7/10
服務：9/10
抵食：9/10
平均每人消費：HK$85

餐廳資料：
上海萬家村小館 Shanghai Man Ka Chuen Restaurant
地址：深水埗福榮街117號地舖
電話：3614 5562