因為原本都無打算寫食評，不過見同枱組員你又影，我又影，結果影影吓都成堆相，但因為實在無準備，所以，影得求其啲，無影到餐牌俾大家參考。總之大家高興，開心飲杯！
醬油花生、栗子 $15餐前小食咁多年嚟都喺呢兩款，價錢都喺收咁多，小弟最早到，所以食住等。花生煮得好腍，又有醬油香，栗子切成小粒，粉糯好食。補充多一句，茶錢就收$10位。
麻醬油麥菜 $68呢個作為涼菜好好食，所以，推介俾組員試，一扎一扎嘅油麥菜被青瓜薄片捲實，入口爽脆俐落，沾上少少麻醬，清新中散發出陣陣濃香，味道有層次。
龍華素鵝 $75印度中好多時啲素鵝都喺香煎，煎得好脆口，但呢個就唔喺，雖被列為涼菜，但就微微哋暖。腐皮咬落甚具豆香，口感軟軟腍腍，都幾好食。
上海風味醬鴨 $65呢道風味醬鴨唔止個樣，食起嚟都有啲似臘鴨咁，不過，食落就無咁肥膩、無咁油，但喺就有一種好濃煙燻香嘅感覺，而咬落肉質有份韌勁，好有咬口，都幾特別。
皇朝小籠包（8色）$142/ 原味小籠包 $118嚟到「樂天皇朝」點可以唔叫小籠包吖，所以，一嗌就嗌兩籠，一籠8色、一籠原味，等大家可以試多啲，始終都唔可以講試勻所有味道，當喺試吓咁啦。老實講，佢哋啲小籠包確喺做得幾出色，賣相摺口工整，正所謂皮薄餡靚，肉鮮味香，鬆化之餘又夠湯汁，而8色嘅口味又確有獨特，基本上喺枱枱都嗌嘅食物。
木樨肉炒拉麵 $90一睇樣你就知呢個炒麵好有上海菜濃油赤醬嘅特色，因為用咗上海拉麵嚟炒，食落比較有韌勁，口感幾好，麵裡面混咗好多豬肉絲、木耳絲、銀芽、洋蔥，所以，食落味道豐富，加上香濃嘅醬汁，味道真喺幾唔錯。
蟹粉炒飯 $142
香煎豆沙鍋餅 $58最後就梗係甜品時間啦，先嚟一客豆沙鍋餅，因為1客有8件，比較易分啲，至少人人都有得食。餅皮煎得金黃，入口香脆唔油，豆沙清甜起沙，的確好味，香口嘢一向有客路。
擂沙湯圓 $45呢一個就有組員好想食，所以都點番1客大家共享，一客只有4粒，手快有手慢無。雖然我就無試，但佢哋就大讚好食，啲湯圓皮口感好軟糯， 裡面填滿香滑嘅芝麻餡，面頭嘅黃豆粉又清香。
宮廷驢打滾 $48雖然「驢打滾」1客只有3件，不過，比起雷沙湯圓，就可以一分為二，變相有6個人都食到。其實，「驢打滾」跟擂沙湯圓有啲異曲同工，不過，層糯米皮就捲住嚟做，此外，捲嘅喺豆沙餡，同樣外層就撒滿黃豆粉。食落軟綿黏糯，唔黏牙，紅豆餡又夠晒清甜。
除咗上述菜式，仲有一碟皇朝話梅骨（$108），影漏咗，我哋7個人最後埋單一千一百幾，都OK啦。訂枱時講明用餐1.5小時，但因為第二輪嘅人大多數都喺等2-4人細枱為主，所以，我哋都無被催交枱，結果就坐咗兩個半鐘有多，傾到夠皮先散場。順帶一提，服務幾好，添茶、收拾都好熨貼。
個人評分
味道：9/10
環境：8/10
服務：9/10
抵食：8/10
平均每人消費：HK$166
味道：9/10
環境：8/10
服務：9/10
抵食：8/10
平均每人消費：HK$166
餐廳資料：
樂天皇朝 Paradise Dynasty
地址：青衣青敬路31-33號青衣城1 3樓310B號舖
電話：2177 8777
樂天皇朝 Paradise Dynasty
地址：青衣青敬路31-33號青衣城1 3樓310B號舖
電話：2177 8777
沒有留言:
發佈留言