山區裡的走走趯趯: 羽山冰室 MountainCafe：「羽」眾不同

2023年7月8日星期六

羽山冰室 MountainCafe：「羽」眾不同

依家以屯馬線由美孚入元朗，其實快過我過海搵食，不過，總喺有個錯覺好似好遠，入親嚟元朗呢邊食嘢都係因為行山，今次同個老死真喺有啲熱血，30幾度高溫挑戰「雞公嶺」，我哋行得快，全程都要3.5小時，但就幾辛苦吓。最後，搭番巴士出元朗食晏，就晌巴士站附近嘅「羽山冰室」醬肚。

雖然叫冰室，裝修有啲似西餐格局，店舖好細，一眼睇曬，大概廿個位多啲，裝修方面就無話一個咩風格，始終喺小店，為咗做多少少生意，所以，枱櫈都排得好逼，基本上都喺同隔離枱搭住坐埋一齊，我哋算好好彩咁啱被安排近窗死角嘅二人枱，其實另一邊都喺黐埋隔離張四人枱。

餐具同糖包、胡椒粉就咁擺咗喺枱面，無餐紙提供，如果要水嘅話，可以向侍應要求，否則，佢哋就唔會特別主動比杯水你。

食物選擇方面，你又唔好睇佢鋪仔細細，選擇又非常之多。正正有啲外賣單張攞，索性掃描貼出嚟，等大家有個參考，我哋就睇啱個特濃蕃茄薯仔湯系列同魚湯泡飯系列。

特濃蕃茄薯仔湯鮮牛肉通粉 $55

個牛肉通粉好好快就送到嚟，份量都幾大碟，色澤鮮紅睇落幾對辦，老友就話果然特濃，不過佢個人本身食嘢就偏健康，所以，話多湯有少少偏酸，但整體感覺都OK嘅，尤其晌大熱天食落醒神啲嘛；薯仔同牛肉都好夠份量，牛肉又幾腍，啲通粉亦都煮得啱啱好。

3.6牛乳炒蛋配蒜蓉牛油多士
我個炒飯都食咗一半，都仲未見佢個炒蛋多士，明顯喺漏單，追一追結果炒蛋、多士都要分開上，哈哈！個炒蛋都幾嫩滑，裡面仲加咗火腿，不過，火腿就有少少過鹹，老友就話唔加好過，多士呢咁你睇樣都係無乜花巧，蒜香味一般般咁啦。

薑絲芫荽皮蛋鮮牛肉魚湯泡飯 $58

同樣，我都喺想食啲濕濕哋嘅嘢食，所以揀咗食泡飯，幾款口味當中，呢個我覺得喺會比較清爽啲。初時以為一大碗過，佢又幾好喎，湯還湯，飯還飯，變相份量多咗。先試啲鮮魚湯，堅喺鮮甜濃郁，絕無欺場，搭埋薑絲、芫茜，另一番風味；牛肉亦都好嫩滑，食泡飯最緊要啲飯粒分明，唔好有爛飯都夾硬加落去；除咗皮蛋，仲有嫩滑嘅豆腐同爽脆嘅木耳，所以，成個飯真喺好食，超推介，睇我全部幫佢清晒就知啦！