吉野家 Yoshinoya：洋風朝食

個多月前，老婆專登帶我落嚟荔枝角嘅「一冰室」食早餐，食完之後晌附近遊走下，經過「吉野家」，都諗諗好耐無食過，走入去睇一睇，發覺佢有幾款早餐都真喺幾啱心水，所以，今次一早行完轉短山，兜落嚟荔枝角，專登試試「吉野家」嘅早餐。

嚟到都10:00am左右，過咗早市繁忙時段，可以講客人唔多，咁樣仲啱我哋靜靜地嘆早餐。

至於早餐有咩選擇，就晌晒電子屏幕，不過，佢哋個電子屏幕喺不斷郁，所以，基本上都只喺咁二望兩眼就算，最後，晌番自助點餐機度慢慢揀。

雖然可以去櫃檯點餐，但我哋都喺鍾意用自助點餐機，因為可以慢慢揀，自在啲，反正相信好多人都用慣晒，無乜難度。

同老婆上次嚟就睇啱「洋風朝食」系列，在乎揀邊款組合，佢就鍾意烏冬，小弟就睇中啲西冷。

W7. 菠菜薯餅+3.6牛乳炒蛋+抹茶多士+鰹魚湯讚岐烏冬+熱檸水 $42
睇個份量都幾夠十足，薯餅、炒蛋、多士等陣先講，依家就重點介紹配烏冬，撳機時發現原來可以+$1轉為芫茜湯底，當然要轉啦，老婆就話個烏冬幾好食，咬落有韌勁，面頭又放好多野菌，鰹魚湯加咗芫茜好有另一番風味，多咗浸獨特嘅香氣，真喺唔錯。

W9. 西冷牛扒+菠菜薯餅+3.6牛乳炒蛋+抹茶多士+熱咖啡 $46
我就揀咗個搭西冷牛嘅，當然出嚟個賣相唔及餐牌嗰張咁靚仔啦，但份量就交足貨，伴西冷都算大大件，當然亦都唔好期望喺厚切啦，但不過質素確喺唔錯，甚有肉味，又有油香，口感軟腍。件菠菜薯餅個人就只喺覺得中規中矩，其實炸得唔油膩，仲幾脆口，微微波菜味，不過，就有少少偏鹹；炒蛋就唔及啲本地茶記炒得咁滑喇，但入口都算喺嫩，講明喺用日本蛋，質素唔需要懷疑；抹茶多士則好抹茶味，夠脆口，只不過喺擺到攤凍咗，令感覺差少少，不過就好襯杯咖啡喇！

除咗個薯餅，整體嚟講真喺算幾好食，仲夠晒飽肚，我哋午餐都無食，改為下午茶搞掂。

個人評分
味道：8/10
環境：7/10
服務：7/10
抵食：8/10
平均每人消費：HK$45

餐廳資料：
吉野家 Yoshinoya
地址：荔枝角長沙灣道833號長沙灣廣場地下G07號舖
電話：2338 2240