馬拉Go MalaGo：「Go」質馬拉菜

在地嘅老死知小弟都幾鍾意食馬拉嘢，佢話晌附近偶然發現呢間「馬拉Go」小店，試過確喺高質，。所以，是夜同朋友到訪，餐廳位處商場二樓，扶手電梯一上到去就見，好易搵。

「啟岸巷子」喺條營造出日系感嘅「食街」，原不過，暫時進駐嘅餐廳唔多，而「馬拉Go」確喺一間小店，左邊幾張高腳吧枱位，右邊就幾張2/4人枱，但就見外賣速遞單唔少。

最吸晴相信喺牆上花花碌碌、色彩繽紛嘅「磁磚」，睇真啲原來喺牆紙，不過，就幾有大馬風情，同埋擺晌四周，相信喺老細珍藏嘅手辦公仔同擺設，我仲發現有黃金戰士呀！

食物方面，幾頁睇晒，分為輕食、惹味叻沙系列、馬搵拉撈麵系列、特色飯食系列及多種特色飲品，務求貴精不貴多。

此外，仲有一款滋味二人餐，包小食拼盤、任揀兩款主食、香蒜時菜、汽水兩罐，睇落確喺幾划算。

招牌蝦麵 $98

老死就推介呢款主食，佢話個湯底保證唔會令人失望，的確個蝦湯唔單止濃郁，好強嘅蝦鮮味，，仲好掛汁，所以，最後一滴都無嘥。而餸料非常之多，麵內有魚蛋、魚片、烚蛋、豆卜、小棠菜同怡保芽菜，另外仲碟上烚蜆、炭燒大蝦同豬頸肉，非常豐富，魚蛋彈牙有魚味，豆卜索滿湯自然好食，怡保芽菜好爽脆，烚蜆鮮甜到不得了，大蝦同豬頸肉果然有炭火香，再混以摻摻（油麵配米粉），很有地道感。

香茅豬扒黑醬油馬拉乾撈麵 $78
另一款主食我哋就想試試黑醬油乾撈麵，大大塊香茅豬扒煎到金黃，仲切好晒，方便食用，而且入口果然鬆化不膩，有陣陣香茅嘅香味，煎蛋下面放咗好多怡保芽菜同啲魚片條，至於個撈麵，入口有韌性，充滿醬油香味，篤穿個蛋黃混埋一齊，又喺另一番風味。

鮮檸梳打 $28、話梅柚子梳打 $30
梳打唔喺用七喜或雪碧，而喺泰國一款樽裝梳打水，無甜味，所以，老友話飲落會比較清爽啲；而小弟嘅柚子梳打加多咗粒話梅，自然有陣陣微微酸香，啱晒夏天飲。

斑蘭椰絲卷 $58
最後，見款班蘭椰絲卷幾特別，印象中好似未試過，故此，追加多一客甜品。外皮煙韌又充滿班蘭香氣，裡面填滿椰絲，似喺用啲棕櫚糖處理過 ，可以講喺甜而不膩，甚有馬拉風味。

唔少人鍾意幫襯啲小店，除咗撐吓佢哋之外，好多時店主都會親力親為，不損招牌，都會製作更加用心，出品自然質素高。

個人評分
味道：8/10
環境：7/10
服務：7/10
抵食：8/10
平均每人消費：HK$146

餐廳資料：
馬拉Go MalaGo
地址：土瓜灣馬頭圍道63號啟岸巷子1樓8號舖
電話：9447 9977