五感日常：「感」於一試

早幾日，搭半山扶手電梯上嚟拍卡慳兩蚊，回程偶爾經過呢間新店，個名都幾特別，啱啱門口貼咗餐牌，望兩眼八吓賣乜，蒟蒻麵？健康嘢喎，啱我老婆，所以搵晚大家都唔得閒煮飯就嚟叫外賣，做晚無飯夫妻。

咪睇個門口細細，入到舖內都有少少深長，裝修簡約，以木系為主，加上別緻嘅吊燈，感覺相當骨子，好有日系風，加上樓底較高，所以就算個鋪比較窄身但都無乜侷促感。由於一收工就過嚟，未喺飯市，無乜人。

門口有啲外賣單張紙攞，所以，索性擺出嚟俾大家參考，基本上就喺蒟蒻為主打，可以喺飯，亦可以喺撈麵，仲有啲湯水、沙律、開胃小食、飲品。餐牌更寫住喺蒟蒻製品專門店，有可能喺全港首間，因為蒟蒻麵（飯）我都喺第一次聽，所以，先至咁好奇要試一試。

今次就簡簡單單，試咗一款開胃小食，加兩份主食，並加配兩支飲品。

五香牛腱 $38

啲牛腱滷得好香、好入味，每塊切得厚薄均一，入口口感鬆化得嚟，仲帶少少韌勁，只可惜一客嘅片數唔多，食得未夠喉而已。

鹽焗手撕雞蒟蒻飯 $58

多年前晌一家意大利餐廳食過一米型意粉，外觀好似米粒，食落去口感跟意粉無分別，而今次呢個蒟蒻飯有異曲同工之妙，望落去同米粒一樣無分別，比較晶瑩，入口口感軟身煙韌，好得意，而且，仲撈咗啲牛蒡絲同埋肉碎，所以食落一啲都唔寡，口感豐富，至於啲手撕雞，味道帶點點鹹香味，肉質算嫩滑，確喺幾唔錯。

蒜香辣椒焗扇貝撈蒟蒻麵 $88
本來想豪一豪試個龍蝦撈麵，不過賣晒，唔緊要，扇貝我都啱。初時我以為就咁俾啲扇貝肉落啲冷撈麵度，原來唔喺，佢真喺原隻扇貝另外焗 ，加上隻扇貝肉好大件，真喺無欺場，入口好彈牙，鮮味十足，充滿蒜香，而且睇樣睇唔出真喺幾強嘅辣勁，好彩我加配咗支柑桔水嚟解吓辣。個撈蒟蒻麵都好正，因為伴有好多青瓜絲、甘筍絲、生菜絲、魚仔乾，再倒埋啲鰹魚湯汁，就正正好似食日式冷麵咁，天口熱，食落就更加舒服、清爽，再者啲蒟蒻麵真喺幾有咬口，口感好唔錯。

桃香烏龍冷泡茶+$8、柑桔水+$8

飲品有加配優惠，同埋佢哋啲飲品真喺好健康吓，老婆就揀咗支桃香烏龍茶，其實，有出開街食飯飲啲冷泡茶都知都唙用一個茶包沖泡出嚟，所以桃味唔會好勁，然而個烏龍茶底都幾香；小弟就選擇咗個柑桔水，呢個真心推薦，因為柑桔味好濃，入口酸香清新，飲落好爽、好舒服。

無論店家嘅飯還是蒟蒻麵，都有啲驚喜，最緊要喺食得健康，又幾有特色。等外賣期間，同店長傾兩句時，更話蒟蒻麵喺啲低碳水化合物食品，啱晒減肥、要控制體重嘅人食，真喺長知識，我淨喺諗好唔好食。

個人評分
味道：9/10
環境：7/10
服務：8/10
抵食：8/10
平均每人消費：HK$100

餐廳資料：
五感日常
地址：中環擺花街1-7號1號廣場地下9號舖
電話：5741 9488