檸檬冰室 Lemon Cafe：午飯凶「檸」

又喺完咗小組後搵飯食嘅時間，今次行遠少少，落咗去葵興邨嗰邊食晏，其實我哋都無咩目標，隨意搵，見到呢間「檸檬冰室」鋪面睇落醒醒目目咁，亦好似幾夠人氣，就中入去撞撞彩食返個午餐。

入面都喺茶記嘅格局，4人枱、6人枱、卡位等等，餐廳叫得「檸檬」，梗喺以黃色做主打啦， 光猛醒目，最緊要都喺地方乾淨，又唔好太逼。

我哋坐埋一邊嘅卡位，啲餐具、紙巾、調味料、餐牌就掛咗喺牆邊，自由取用。

午市想食得抵啲嘅不外乎常餐、特餐同埋啲午餐 ，午餐定價$50到$68，對比起附近嘅茶記會貴少少，不過，就包餐湯，又包嘢飲。

羅宋湯

餐湯有中湯、西湯揀，前者就老火湯，後者就羅宋湯，睇色澤個羅宋湯幾對辦，酸酸香香，又有幾多蔬菜喺裏面，不過，稍嫌辣度比較強，有少少嗆喉嘅感覺。

秘製無骨海南雞配香茅油飯 $68

老友一心一意期待呢個海南雞飯，不過，佢話整體都喺麻麻地，唔合格，死因一，啲雞無乜味，比較淡口；死因二，雖然皮下脂肪少，但喺雞皮感覺唔夠爽；死因三，油飯雖然有啲香茅香，但有微微煮爛飯嘅感覺，此外，一般海南雞都會配有辣醬、黑醬油同薑蓉，但呢度薑蓉就無咗，俾咗幾條泡菜。

XO醬乾炒牛河 $55

小弟揀嘅牛河超級大碟，份量喺平時慣常所見碟頭嘅份量再多20-30%，炒得外觀唔錯，至少火土炷炷河粉都上晒色，唔會炒得唔勻巡；味道方面因為加咗XO醬，自然比普通乾牛河更加香濃惹味，牛肉本身都幾軟腍，同埋份量好足，所以，我就幾滿意碟牛河喇。

馬來咖哩雞球配飯 $55

碟馬來咖喱又喺好大兜 ，飯量亦都十足，我都忍唔住口拮咗一小件咖哩雞試試，個咖喱確喺有少少馬來風味，滲出陣陣香料味，雖然唔及印度咖哩咁重香料，但亦都好有層次，啲雞呢我就覺得幾嫩喎，不過，老友就話有啲雪味，要扣番少少分囉！

熱奶茶
老友就揀飲咖啡，我呢？嚟到茶幾熱奶茶喺一貫嘅選擇，雖然食物嘅質素有啲參差，不過，杯奶茶真喺沖得唔錯，茶底幾香，幼滑度都OK，茶奶比例啱我口味。

最後想講啲服務，真喺好麻麻，落單時我哋以為午餐一喺揀餐湯，一喺揀嘢飲，其實兩樣都包，不過，落單個妹妹仔無問我哋要咩湯，結果，食到中段睇見隔離有湯有嘢飲，先問問另一侍應補番。此外，3個人點3個都喺午餐，點知每個餐相隔差唔多近20分鐘先到，所以，第一個朋友食完個海南雞，唔係講笑，最後個朋友足足等咗大半個鐘先嚟佢嘅咖哩，但當其時成間餐廳又唔喺坐到爆喎！

個人評分
味道：7/10
環境：7/10
服務：3/10
抵食：8/10
平均每人消費：HK$55

餐廳資料：
檸檬冰室 Lemon Cafe
地址：葵涌禾葵里2號葵興商場地下10-12號舖
電話：2638 8700