Tuned Coffee & Roastery：美味小綠洲

都好長一段日子無落嚟太子食嘢，今日嚟到洗衣街近太子一段搵食，因為有好多特色咖啡店，此外，就喺同個老死聚一聚，講講近況，佢做環保行業嘅，晌香港其實都惡做，盼望佢轉新工有眉目啦！講返搵食先，今次就嚟到「Tuned Coffee & Roastery」，因為睇到風評不俗，應該穩穩陣陣好差唔得去邊。

鋪面用上落地大玻璃，一眼就好通透睇到餐廳嘅內部環境，相信日頭嚟有啲陽光透進入去會更感活力。店內裝修簡約，白色為主調，牆上掛滿好多跟咖啡有關嘅插圖同裝飾，此外，由於樓底特別高，所以，空間感好強，整體感覺予人舒服悠閒。

主餐牌上嘅菜式都喺全日供應，包括有沙律會、早午餐系、意大利麵、意大利飯、共享嘅大盤菜式、甜品，以及各類飲品，以咖啡店嚟講，選擇都唔少。

無花果合桃石榴果黑醋沙律 $105
不愧為沙律碗，真喺一大兜沙律，唔止沙律菜多，無花果、紅石榴，以及合桃碎、羊奶芝士落得都無手軟，份量好有驚喜，都真喺無諗過咁大碗。此外，唔好以為就咁沙律菜淋上黑醋就算，啲黑醋嗒落喺比較杰身、濃厚啲，識食嘅就知道啲黑醋喺煮過，特別純香，無花果亦好清甜，紅石榴本身已被喻為超級食物，有好高營養價值，有抗氧化之效，混埋所有材料一齊食，令到整道沙律嘅味道豐厚。

松露油忌廉大啡菇貓耳朵 $115
意大利麵嘅家族中，貓耳朵算喺少食，因為都唔喺好多餐廳會做，今日難得呢度有，當然要試啦。先講啲貓耳朵，煮得啱啱好，軟身得嚟煙韌有咬口，每粒都沾滿汁，陣陣松露香，淨食啲粉都已經非常正，再者，裡面混和好多大啡菇片， 菇味香濃，驚喜位喺撒咗好多松子仁，以及灑上大量巴馬臣芝士，令到香氣更上一層樓，勁多重口感。

慢煮黑蒜牛面肉燉意大利飯 $138

成日都講，意大利飯最能夠考到一間餐廳師傅嘅手藝，加上呢個牛面肉用上慢煮方式處理，真喺好難唔揀佢囉。睇到啲意大利飯夠晒濕潤，入口真喺唔錯，每粒沾滿忌廉汁，咬落米心有種煙韌感，卻無生米嘅感覺，再試試啲牛面肉，煮得超級鬆化呀，誇張啲講句，真喺無牙嘅都咬得開，而且，濃郁好味，好食肉嘅朋友，真喺唔可以錯過。

泡沫黑咖啡 $45
老友鍾情齋啡，所以揀咗杯黑咖啡，但又想試得特色少少，就試咗呢杯加咗一層奶泡嘅黑咖啡。佢就話面層嘅奶泡口感非常之柔滑、輕盈，經一輪沉澱，下面會變返深啡色嘅黑咖啡，咖啡的味道很強，但入口很舒服。

拿鐵 $40
單喺賣相已經可以講攞滿分，因為個心形拉花唔單只線文細緻，而且，均勻對稱，加埋表面好平滑，真喺無乜挑剔位，味道口感方面又如何呢？咖啡味好醇和，有陣陣果仁香氣，口感亦都幾順滑，確喺唔錯！

焦糖香蕉貝殼窩夫 $105
見隔離枱嘅窩夫好似好正，所以，我哋都即興追加多一份貝殼窩夫，唔喺講笑，絕對交足貨，除咗窩夫、香蕉，仲伴雲呢嗱雪糕、吉士醬、鮮忌廉，仲放咗一小株露絲瑪莉做裝飾，貝殼窩夫外形又得意，成件事就靚仔晒。

由於新鮮焗製，窩夫入口仲喺熱焫焫，切開裡面你都見質感好綿密，入口好軟熟，唔會一陣風，蛋香味十足，而啲香蕉真喺做咗層好脆口，又焦香嘅焦糖，襯窩夫好好食，再者，無論伴上忌廉還是吉士醬，滋味更加升級，伴雪糕就有一凍一熱嘅冰火感。另外，值得留意個雪糕球有一點點小黑點，喺雲呢拿籽嚟，所以，雲呢拿香味嚟得自然，唔喺香精貨可比。

除咗環境舒服之外，食物做得具水準，見到菜式上有唔少細節位，侍應都喺後生細仔，但招呼好唔錯，上甜品時，同時都會幫我哋換過另一套餐具。所以呢，就算入嚟飲杯咖啡，呢度確喺可以讓人抖一抖嘅小綠洲 。

個人評分
味道：9/10
環境：8/10
服務：8/10
抵食：8/10
平均每人消費：HK$275

餐廳資料：
Tuned Coffee & Roastery
地址：太子洗衣街163-163A號鴻德大廈地下B號舖
電話：2381 3688