Pizza Maru：「韓」意來襲

小弟嘅荃灣食評不時都會提到週六或假期，會同老婆過嚟睇場早場，之後再搵個地方食晏。今次都喺，走到過嚟睇早場，不過，今次有少少唔同，拉埋老表過嚟一齊睇，之後就專登過嚟「Pizza Maru」食晏。其實之前好幾次經過都見好多人排隊，一直都想嚟試，不過，得兩公婆食唔到幾多，但今次三人行，終於可試試。

睇完早場先11:30am，但餐廳開12:00pm，佢哋就真喺要到12:00pm先開始俾你撳飛入去。好多人同我哋一樣，都喺揀最入面嘅窗口位，雖然睇唔到咩景，但勝在感覺開揚，光猛舒服，環境方面，一室柔和燈光，帶點田園風。

餐牌大大本，除咗沙律、小食、仲有超多款薄餅，以及韓式炸雞、意粉……等等，價錢方面，個人就覺得屬於中等。

蜜糖蒜香炸雞 $123

韓式炸雞份量分為6隻、12隻，我哋3個人要6隻份都已經好夠食，因為每一件雞都好大隻吓，啲雞炸得好金黃，咬落咔咔聲好香脆，卻唔油膩，炸得非常出色；睇相你都見淋咗好多蜜糖蒜香醬，所以，食落味道帶點甜，陣陣蜜糖清香，以及濃濃蒜香，加上肉質比預期嫩滑，所以，都好滿意呢度菜式。

韓式海鮮炒年糕 $96
既然佢喺一間韓國餐廳，當然試試佢哋嘅炒年糕，估唔到放咗好多海鮮料，青口、大蝦、魷魚，落得絕對無手緊，而年糕炒得煙韌，極有咬口感，加上掛滿韓式甜辣醬，所以，食味一流，當然佢哋個辣醬嘅辣度都幾犀利，小弟食得唔多 ，最後由老婆包底。

韓國烤肉薄餅 $148
嚟到嘅客人個個都會叫薄餅，所以，個薄餅都等咗好耐先登場，本來都想試啲加州系薄餅，不過太重芝士，老婆唔太OK，所以，揀咗呢款有少少韓國特色嘅烤肉薄餅，烤肉唔喺平放鋪滿整個薄餅，而喺堆成一個小山，分成6份，正正就喺6件薄餅。咪睇佢堆埋一齊好似牛肉球咁，其實喺少少切碎嘅牛肉，所以，入口好鬆化，而且好惹味，餅底喺薄批，但又唔似「餅乾底」咁薄咁，帶少少韌勁，都唔錯。

計埋飲嘢，百六蚊一個頭，都算喺咁上下啦，整體嚟講，啲嘢食都做得幾出色，尤其個炒年糕，我覺得最好食喺佢，其次喺個炸雞。至於服務方面，侍應大都喺外籍人士，都好有禮貌，而且，亦主動加水、收碟，難怪我哋離開時，出面已經開始需要等位喇！

個人評分
味道：8/10
環境：8/10
服務：8/10
抵食：8/10
平均每人消費：HK$160

餐廳資料：
Pizza Maru
地址：荃灣楊屋道1號荃新天地UG樓UG28&30號舖
電話：2637 0338