少爺燒鵝燉湯館：大少，開飯啦！

燒味喺香港嘅傳統地道美食，小弟就無話因健康關係而少食，但確實近年就真喺食少咗，其實無話咩原因，因為香港美食實在太多。之不過，隔耐咗，對燒味又會有種癮起嘅感覺，所以，趁今晚屋企無飯開，一支公嚟咗位於尖沙咀「戲曲中心」內嘅「少爺燒鵝燉湯館」食個便飯。 

諗住如一般燒味菜館，入到去，原來裝修都幾骨子喎，一室白襯湖水綠，收銀位裝修到好似中藥啲百子櫃咁，牆上又有很多彩繪及舊海報，甚富中國色彩，部份又有啲香港嘅情懷，相信因為位處「戲曲中心」內，都想襯番個文化氣息。不過，是夜應該無表演，所以，客人都唔多，啱我，靜靜哋食番餐，反而間中有人嚟買外賣。

餐具、調味料就放晌枱旁，一雙筷子刻上好意頭嘅祝賀語，依家酒樓都懶得用，都好少會見到。

叫得燒鵝燉湯館，燒味同燉湯就唔可以錯過啦，先講主餐牌，燒味嘅選擇非常之多，燒鵝、乳豬、燒腩仔……就唔在講啦，仲有鵝油撈麵、口水雞……唔喺間燒味飯店都會有做，有碟頭飯，亦可以淨燒味。最感意外嘅喺有時下好興嘅蔥油豬扒，又有茶記必有嘅常餐、特餐。

另外，亦有套餐供應，「少爺套餐」就分1、2、4人份量，越多人，菜式就越豐富；而「奶奶藥膳燉湯」可以選為套餐，就喺1人份量，雙拼燒味可以任揀就喺唯一好處。最後要前者，計落性價比高嘛！

菜膽雞腳豬肺湯

雖則話以形補形，但我就唔喺好信呢家嘢，小弟經常行山，自問腳力、心肺功能都幾唔錯，不過，就幾鍾意飲豬肺湯，一碗靚豬肺湯好花功夫架，尤其洗豬肺。呢碗湯就夠晒足料，飲落你就會覺得有種夠火喉嘅感覺，香濃卻不膩，味鮮而清潤，飲到中段，仲撈到啲瑤柱碎。

鵝汁油菜

食燒味飯，還是食粉麵，搭碟油菜就梗喺無咩特別，但淋上鵝汁，就唔同晒啦，多咗一份香味。

燒鵝拼燒腩仔配白飯

其實，本身都喜歡食燒味，但都知食太多就唔太好，偶一為之就絕無問題，而當中，難得一支公，所以，放縱少少燒鵝拼燒腩仔，估唔到份量都幾多，一個人食真喺幾飽吓。啲燒鵝真喺做得有一手，入口外皮脆口，陣陣焦香，而肉質柔嫩充滿油香，沾上少少冰梅醬，微微嘅酸香更去走晒嘅油膩感；燒腩仔亦做得具水準，外皮堅喺卜卜脆，而肉質比預期瘦，無乜肥膏，口感卻非常鬆化，更醃得啱啱好，無過鹹嘅弊病。

本來打算食個便飯，結果食咗個豐富晚餐，無論燉湯，抑或燒味飯，都喺有質素嘅！尤其開始秋涼，飲碗燉湯就更啱啦，食完搭兩個站就返到美孚，15min唔使就返到屋企。

個人評分
味道：8/10
環境：7/10
服務：7/10
抵食：8/10
平均每人消費：HK$148

餐廳資料：
少爺燒鵝燉湯館
地址：尖沙咀柯士甸道西88號戲曲中心地下GF-05舖
電話：2805 1180