Chapter 3 Steak Bar & Restaurant：「3」心兩意

老友工作上有啲新轉變，約小弟出嚟啤一啤，不過，好老實，小弟一向都唔多好酒，但家下啲酒吧餐廳嘅食物都做得好有水準，就算唔飲酒，三幾個嚟食吓飯都好唔錯。問咗食友嘅心水，就推介太子呢間「Chapter 3 Steak Bar & Restaurant」，話菜式多元化，定價算親民，加上地點都好就到我哋。

雖然喺酒吧，但裝修都睇得出花過心思，有啲巨型嘅壁畫，畫得好專業，而且，燈光唔會太過幽幽暗暗，氣氛亦都幾輕鬆，加上樓底好高，整體感覺幾唔錯。如遇上足球賽事夜，相信會更加熱鬧，因為呢度有得睇直播，此刻就正正重播緊啲英超賽事。

都講過依家啲酒吧餐廳唔再只喺賣酒，食物都做得有水準，而且，款式都多，翻一轉餐牌，就見到有沙律、餐湯、小食、漢堡、意大利麵、意大利飯、燒烤主菜……等等，好多樣嘢都想試，真喺搞到三心兩意。定價都唔貴喎，而且，份量好足。

咁既然喺酒吧，烈酒、餐酒、啤酒……各式其式嘅酒類當然唔少得，不過，亦有好些非酒精類飲品。順帶一提，甫坐低侍應就會送上一份粟米片小食，收$40，但可以唔要，同店員講聲就可以，呢樣真喺幾好，無鋸人嘅心態，真正俾選擇個客。

Gold Apple Cinder $46、Heinekin $48

高興事就梗喺啤吓佢啦，小弟揀咗支「金蘋果仙地」，都有成4.5%酒精度，不過，因為加入金蘋果汁，所以，易入口，口感清爽，襯晒啲蟹餅同豬肋骨呢類濃味食物。

美式蟹餅 $128
洋蔥圈、雞翼、焗薯皮……呢類都多機會食到，梗喺揀特別少少啦，再加上見好多食評都推介呢一道蟹餅，真喺搞到心郁郁唔想錯過。一客有兩大件蟹餅，食過你就知幾足料，啖啖都喺蟹肉，好有鮮味，無話勁溝粉，絕對貨真價實，而且，煎得外皮脆脆哋，仲伴有沙律菜、香橙肉，賣相都無馬虎，細心位喺就連淋落沙律菜嘅黑醋都處理過，醇厚唔嗆喉。

香烤美式豬肋排（12安士）$178

平常晌啲出名少少嘅連鎖美式餐廳點一客豬肋骨，都要成二百幾，仲要無咁大件添，所以，呢度只賣178真喺算好抵食。上到枱大大件豬肋骨，肯定足12安，全無欺場，燒得外觀又靚仔，更伴有大量薯菜，真喺夠3、4人共享。

講到條骨，成條共9支骨，一人3支就啱啱好，啲肉烤得好鬆化，又易離骨，個燒烤醬惹味到不得了，食食吓都落埋手，一啖肉，一口仙地，爽到不得了。而薯菜都有心思呀，除香脆嘅薯條，仲有甘筍仔、西蘭花、椰菜花，唯挑剔位喺啲菜只白烚，但佐以燒汁，補番數啦。

燒烤風味自家手打薄餅（12吋）$148

怕唔夠飽，搵個薄餅墊墊底就最穩陣，12吋嘅薄餅一睇就知交足貨啦，好大個，亦好足料！餐牌標示有芝士、雜肉腸、辣肉腸、煙肉、火腿、甜椒、洋葱，再配以燒烤醬，但嚟到批底塗咗層茄醬，面頭先再唧上燒烤醬，個人覺得燒烤醬味唔夠強，其實，可以連批底都塗上燒烤醬；另外，配料多，食味唔錯，不過，批底嘅厚度喺慣食開嘅薄批與厚批之間，口感比較乾，影響咗整體嘅觀感。

眼見，有唔少人喺專登嚟食飯，飲酒都喺淺酌而已。此外，呢度啲招呼幾唔錯，啲店員都好醒目，主動收走食完啲碗碟，又幫忙添水，食物亦有水準，無怪乎越夜就見越多人嚟幫襯！

個人評分
味道：8/10
環境：8/10
服務：8/10
抵食：8/10
平均每人消費：HK$210

餐廳資料：
Chapter 3 Steak Bar & Restaurant
地址：太子花園街232-234號地下J號舖
電話：2386 1832