山區裡的走走趯趯: QUE：和風新「滋」態

2022年10月12日星期三

QUE：和風新「滋」態

嚟得東涌只有3件事會做，一喺就行山，一喺就宅渡假，一喺就有嘢想買，行Outlet。自從上次入嚟宅渡假，有較多時間逛逛東薈城，發覺多咗個二期，開咗好多餐廳。今次所試嘅日式西餐廳「QUE」又喺晌二期呢邊，並且喺新開無耐。

晌門口已隱約感覺到餐廳嘅裝修風格，以木系為主調，裝修清新簡約，而店內更有唔少植物作點綴，尤其近門口嘅「大樹」，更喺當中重點打卡位。再加上地方闊落，樓底又高，予人感覺寬敞，讓整體氣氛更閒適，讓人有多一份寧靜。

我哋被安排最入面嘅卡位，細心留意嘅話，猶如和風古居嘅風格，餐枱都喺實木所做，敲落去喺沉實嘅木聲。

此外，要留意嘅喺店內有好多特色小擺設，如甚具日本古雅風嘅盆栽，仲有好多好可愛嘅「貓貓」，像真度非常高，霎眼望埋去，幾可亂真呀！

主餐牌製作精美，翻一翻，選擇都非常之多，作為西日餐廳，菜式真喺頗為特別，類別分為小食、壽司塔可、沙律、全日早餐及三文治、主菜、意粉及意大利飯、日式丼飯，剛好晌門口拎咗張單張，兩頁紙就印晒所有食物。

不過，甜品及飲品就要睇番主餐牌，選擇極多，尤其特色咖啡及各類特飲。雖然餐牌無列出嚟，但見鋪面嘅餅櫃仲有啲烘焙產品，如牛角包、招牌蘋果批。

不過，計落都喺「晚市二人套餐」抵食啲，整個套餐包咗小食（2選1）、沙律（2選1）、主食（6選1）、甜品（3選2），定價就視乎所揀嘅主食，$468-$558；另可追加招牌嘅壽司塔可，包基本啡茶，亦可以額外加錢升級其他特別飲品。

石榴泡泡綠茶 +$38

賣相有啲似雞尾酒嘅做法，非常之靚，杯面除咗插有一件蕃石榴之後，更加上一束花串作點綴。入口感覺好清爽，源於啲梳打，而味道先有一陣陣石榴清香，再啜落喺幽香嘅綠茶味，呢個配搭有啲驚喜。

粉紅椰子水 +$38

另一杯椰子水，真喺粉紅色，但入口猶如平常所飲嘅椰青水，好清甜，但有啲好奇，點解會粉紅色？侍應解釋並無加任何色素，而喺一啲光合作用做成。上網摷摷，原來唔喺咩稀世特別嘢，只喺少見多怪，哈哈，粉紅色喺椰子水裡面嘅多酚與空氣和光接觸後出現嘅反應而已，真喺長知識。

日式咖喱味炸魷魚配紫蘇香蒜蛋黃醬

據聞籌備緊「魷魚遊戲」第二季，雖然未知幾時有，先嚟個炸魷魚祭祭旗，哈哈。啲炸魷魚傳出陣陣咖喱香味，入口外層香脆不膩，而且，裡面柔韌有咬口，最精彩喺隻紫蘇香蒜蛋黃醬，點咗之後絕對有畫龍點睛之效，令食味更具層次。

QUE鮮雜果沙律配芒果汁

以店名命名應該睇高一線，以沙律菜為基礎，再加上士多啤梨、藍莓、車厘茄，食材食得出夠新鮮，而亮點相信喺放有大量紅石榴，稱為水果界嘅紅寶石，其賣點喺具有超強抗氧化力，且更有好多營養要素，唔喺浪得虛名，再淋上芒果汁豐富番個味道，整道沙律夠晒天然健康。

吉列鹿兒島豚肉配火箭菜、木魚絲及自家製豚肉汁

主食就揀吉到豚肉，平常食日本定食，都不時揀吉到豚肉，可以睇到師傅嘅炸功。作為主食，件豚肉都幾大件，並配有好多火箭菜，而豚肉炸得金黃，色澤均勻，一口咬落咔嚓應聲裂開，外層甘香鬆脆到不得了，卻喺唔油膩，口感軟腍富肉汁，不愧鹿兒島貨色。而自家製嘅豚肉汁亦記一功，帶微酸嘅醬汁，令豚肉食起嚟更加滋味。由於套餐只得一份主食，個人覺得加多兩份澱粉類伴菜俾客墊墊肚好啲，真喺怕有啲客會食唔飽。