環境就唔太多嘢講，就講吓餐牌，呢度就以車仔米線形式點餐，除剔紙仔，更可以用二維碼落單。選湯底（$29-$34），選麵底，選辣度，特別喜好，再揀餸（分3個價位：$8、$9、$10），相信喺香港人都無乜邊個唔識，每一類別嘅選擇都多。此外，店家仲有好多特色小食，都喺廿零、三十，值得試試，仲有豆漿、綠茶、汽水供應。
杯裝豆漿 $9、玉露綠茶 $9 先嚟兩個嘢飲，小弟就揀豆漿，話晒朝朝早餐都配咖啡，夜晚就健康少少飲豆漿，豆漿唔似喺自家製，不過，豆味都幾夠濃，甜度又啱啱好；友人就揀玉露綠茶，佢話好夾一陣食麻辣米線喎。值得一提，店家都幾環保，可以走飲管架！外賣時亦可以走隔層、走餐具，抵讚！
蒜香醬油雞翼 $27 呢一款小食喺推介之一，睇落好似平平無奇，咪雞翼囉，其實都有啲心思。首先喺做成單骨，食起嚟就方便多少少，而先以醬油煮，所以，雞翼本身都好入味，而鋪上蒜蓉，但不得不講，啲蒜蓉刴到極之幼細，蒜香味更細緻。
榨菜豬肚絲 $31 堆到一整碟，好夠份量，而且，唔喺就咁俾晒榨菜，得少少豬肚絲，而喺有好多豬肚絲，好似食極都有。伴米線幾好，榨菜鹹爽爽，豬肚絲就滷得入味，煮得夠軟腍。
秘製麻辣配米線 + 豬軟骨、滷水大腸、豆腐卜、炸魚皮 $68 先介紹老友嘅米線，食得辣嘅佢就揀麻辣湯底，辣度就少少辣，佢話少少辣勁，卻甚具麻香，越食越醒神。除咗有啲基本配菜：炸醬、韭菜、芽菜、蔥，仲點咗4餸，成碗粉大大碗，每款餸料亦俾得好足。豬軟骨、大腸都好夠味，滷水嘅香味好醇厚，最讚喺啲大腸一啲臊味都無，豆卜精彩之處就是嗦晒麻辣汁，老友就大讚無得頂，而米線好滑溜。以上都喺老友嘅分享，炸魚皮另碟上，所以，我都有試，驚喜一喺只不過一款餸料，卻喺大大碟，驚喜二喺既香脆，又無油益味，讚呀！
特濃新鮮蕃茄湯配紅薯粉 + 秘製腩肉、雞肉絲、冬菇皇 $63 小弟不嗜辣，特濃新鮮蕃茄湯底啱我多啲，而揀呢個湯底，本身已包咗鮮蕃茄、韭菜、芽菜、蔥，而小弟就另外加3餸就夠，配紅薯粉，同樣大大碗到不得了。
先飲啖湯，的確，個湯嘅蕃茄味真喺好濃郁，酸香鮮活，加埋有啲蕃茄咬吓，越食越醒胃。所以，最後連湯都飲埋，個肚漲到呢……！
跟住試試啲腩肉，切成薄片，最鍾意佢喺瘦底，無咩肥肉，而且，煮得好入味，又好有肉香，口感軟腍，好食。
啲雞肉絲有眼你睇，多到好似大放送咁，最有心思喺手撕得嚟做到好細碎，完全喺手工嘢，食落似食豬肉鬆咁，但又不失肉質感，嗦咗汁就更正。
不愧冬菇皇，真喺勁厚肉，車仔麵檔好少見，通常喺擺酒席時先會用到咁大、咁厚身嘅花菇。本身炆煮得夠透，咬落去時，盲測嘅話仲以為食緊飽魚，當然講口感，唔喺講味道啦。事實上，確喺幾濃冬菇味，兼且份量多，墊晒晌下面睇影唔到啫。
最後講講啲紅薯粉，彎彎曲曲嘅紅薯粉好掛汁，而佢嘅口感入口好有韌性，又有份彈牙感，卻又唔會咬極都唔斷。
「貴綠」嘅過人之處唔喺單單大份，無論米線 / 薯粉，抑或餸料，都賣大包，份量超十足，而且，餸料嘅製作亦見心思，正所謂人無佢有，人有佢精。怪唔之得，堂食客似雲來之餘，更有唔少外賣客，真喺睇到一單接一接，而我哋就食到捧住肚走。
個人評分
味道：9/10
環境：7/10
服務：8/10
抵食：9/10
平均每人消費：HK$103
味道：9/10
環境：7/10
服務：8/10
抵食：9/10
平均每人消費：HK$103
餐廳資料：
貴緣小鍋米線 Gui Yuan Siu Wok Mixian
地址：紅磡崇潔街20號地舖
電話：5222 0894
貴緣小鍋米線 Gui Yuan Siu Wok Mixian
地址：紅磡崇潔街20號地舖
電話：5222 0894
沒有留言:
發佈留言