Almond Dessert 杏甜品：有「杏」遇上

小弟甚少出嚟旺角，怕人多，出親嚟就喺行「女人街」、「波鞋街」，主要都喺添少少裝備。而出開嚟都會周圍打個轉，每次出嚟都發覺開咗好多新餐廳，行到嚟豉油街，睇見呢一家以杏仁為主題、門面好清新嘅港式糖水鋪，晌門口望兩望，覺得啲款式又幾特別，所以，膽粗粗一試。

裡面地方細細，一室以白色為主調，加上木系枱櫈，裝潢清新，明顯對象都喺一眾年青人。此外，開放式廚房，睇到師傅仔整甜品，睇到裡面衛生企理。

晌門口睇以為唔多嘢，入到去坐低，再慢慢睇個餐牌，原來有幾多選擇，話港式糖水鋪，但賣嘅款式都有亮點，類別包括足兩燕窩系列、椰皇燉雙皮奶系列、鮮果爽冰系列、杏仁茶吸吸杯系列、水果吸吸杯系列、木蓮凍系列、傳統港式糖水……等等。此外，更有一組「杏」福加配，可以選擇額外加配心水食材。

芒椰木蓮凍 $62

一心一意入嚟試木蓮系列嘅糖水，小弟都算食唔少甜品啦，木蓮都喺第一次聽，所以甚好奇喺乜嘢，而揀呢款喺因為有芒果囉。以木蓮凍做底，並配搭上芒果爽冰、芒果粒、4色小芋圓、椰果，大大份一大木碗，又灑上少少杏仁碎做裝飾賣相非常討好。咪諗住賣到六十幾蚊好似好貴，其實，份量都夠兩個人「些牙」架。

先試啲木蓮冰，與其話似仙草，個人覺得似龜苓膏多啲，因為嗒落有啲甘甘哋，而芒果好鮮甜，小芋圓好有咬口，椰果又煙煙韌韌咁，一次過將所有嘢放入口，口感多變，味道多元化，加上啲個芒果爽冰慢慢溶化，令到入口芒果味更濃，感覺更涼爽。

呂宋芒小丸子杏仁茶吸吸 $55

既然呢度主打「杏」，無理由唔試番一款以杏為主角嘅嘢架，就揀一款杏仁茶飲，口味就以配上小弟至愛嘅芒果。先啜一口杏仁茶，嘩！嗰一層杏仁味極之強，濃郁到不得了，口感細滑；而下面睇都睇到有好多芒果肉，香濃清甜，好似啜極都有，仲加埋咬口嘅白玉小丸子，可以講喺多重享受。事後店員講，佢哋嘅杏仁採用美國大龍杏，再幾重過濾，所以，先做到咁細緻。

杏仁呢樣嘢，作為堅果就咁食，好多人都接受到，但杏霜、杏仁茶卻又未必人人都喜歡，但如果你喺好鍾意杏仁茶一類嘅人，真喺唔好錯過。當然，杏仁以外嘅糖水，店內都仲有好多選擇。事後再上網睇睇先知，呢間喺新開張，原來一早有尖沙咀店。

個人評分
味道：8/10
環境：7/10
服務：8/10
抵食：8/10
平均每人消費：HK$50

Almond Dessert 杏甜品
地址：旺角豉油街25-31號地下3號舖
電話：6998 2677