時代冰室 Times Cafe：「代」遇不同

今日過到嚟長沙灣同親友交收，加上行程緊密未有時間食午餐，晚上又有小組聚會，所以，路過呢間「時代冰室」，趁機食番個超級下午茶餐，當喺一餐頂兩餐。

「時代冰室」試過太子店而已，當時感覺喺食物唔錯，但環境麻麻，好擠逼，招呼差，近乎催客埋單。不過，今次嚟長沙灣店感覺完全相反，地方大之餘，啲卡位都舒服好多，而且，招呼我位哥仔幾有禮貌添。

呢個時間嚟，目標就梗喺下午茶餐啦，一個餐牌仔睇晒，由H1到H14，平有平食，貴有貴食，最彈性喺有幾款追加項目俾多個選擇你。

另外，仲有一啲特色心太軟西多士餐，鍾意食西多士，又喜歡試新嘢嘅客人就啱晒啦。

此外，佢哋仲有一系到新鮮出爐嘅烘焙產品，定價都喺好似出面啲麵包鋪咁上下，就算唔晌度即場試，亦不妨外買請屋企人。

餐具、調味料全部都喺放晒晌枱側嘅抽櫃中，呢種已喺茶記嘅常規設定。

巨人蛋治配皇牌雞脾 $42
平常茶記啲炸脾一喺配沙律，一喺配薯條，呢個配蛋治，唔喺普通蛋治，喺「巨人」份量，即喺大份啲，的確，啲炒蛋喺疊到幾厚身，可以講喺一次食咗兩個茶餐咁滯。

雖然睇落件蛋治好似得半份，但用上厚身軟熟嘅方包，所以，都有一份蛋治嘅「包量」；而雞蛋估計都用上兩隻，因為咬落好厚蛋，蛋味亦幾香，當然，炒滑少少就更好啦，老實講，驚喜就無架喇，但穩穩陣陣咁啦。

隻皇牌雞脾斤兩十足，好大隻，好厚肉，拎上手就知好有份量，好墜手，但最緊要喺炸得靚仔，佢哋啲脾睇落似喺先滷後炸咁，色澤較深，炸得啱啱好，咬落外皮非常脆口，帶有焦脆感，肉質嫩滑，富肉汁，又唔油喎，更無炸燶嘅問題。

熱奶茶
嚟到茶記，熱奶茶喺必然之選，茶色睇落都對辦，而入口茶底都算得好幽香，茶奶比例亦OK，口感就未見好細滑，所以，唔算高質，又未算差，只可以講喺中中等等而已。

今次對比上次晌太子分店食午飯，感覺好好多，可能無咁多人，招呼都可以做好少少。加上今次揀咗個豐富下午茶，食得滿足，心情自然又好啲。

個人評分
味道：8/10
環境：7/10
服務：7/10
抵食：9/10
平均每人消費：HK$42

餐廳資料：
時代冰室 Times Cafe
地址：長沙灣青山道305號One Madison地下1B號舖
電話：2367 7123