山區裡的走走趯趯: 中華小館 The Orient Cuisine：

2025年9月25日星期四

中華小館 The Orient Cuisine：

與老友聚一聚，到灣仔食個晏，但就想搵個靜靜哋嘅地方方便傾偈，左搵右搵就揀嚟灣仔嘅「中華小館」，嘆吓高質素嘅中菜。

踏進餐廳，環境確喺幾古雅清幽，牆上掛起啲鄉間油畫，帶出一份文化氣息，加上樓底有番一定高，感覺予人舒服閒適。唔好以為睇落唔大，其實仲有閣樓，不過，小弟就無上去探個究竟！

午市商務套餐，分2、4、6、8、12人，都幾有彈性，而我哋所揀嘅2人套餐包咗滋潤燉湯、燒味雙拼、燒汁班頭腩、翡翠帶子蝦仁、蒜蓉炒菜苗，敬送絲苗白飯及精美甜品，定價$468，另收茶錢$15位及加一服務費，佢哋啲服務幾唔錯，侍應亦好有禮貌。

滋潤燉湯
初頭以為都喺慣常見到一盅盅嘅燉湯，嚟到喺以紫砂功夫茶壺盛載，非常別緻。打開撈一撈，有雞肉、赤肉、海底椰、金華火腿、螺頭……等等，呷一口，個湯味道濃郁，好夠火喉，而且，好潤喉，飲落非常舒服，此外，啲湯料都幾好食，唔會無晒味。再者，個紫砂壺好保溫，去到中段都仲喺好夠熱。

燒味雙拼

燒味喺店家嘅招牌嘢，啲套餐自然會包咗，最好喺雙拼，可以試到兩款燒味嘛！先試試蜜汁厚切叉燒王，喺店家嘅得獎之作，入口果然喺超鬆化，8分瘦2分肥，蜜香中帶少少油脂香，最正喺有少少燶邊位。脆皮燒腩仔亦都好正，外皮堅喺卜卜脆，而肉質比預期瘦，無乜肥膏，口感卻非常鬆化，更醃得啱啱好，無過鹹嘅弊病，沾上少少芥辣，極具風味。