和田便當 Wada Bento：唔止「田」肚咁簡單

過到嚟金鐘，通常得兩樣嘢做，一喺上政府合署，一喺就過去運輸署，不外乎幫公司、幫老細過嚟搞文件。今日過到嚟，又順便睇睇有咩外賣好食。在「遠東」、「海富」兜個圈，見到呢間「和田便當」，吸引入去望望喺因為佢哋喺自助便當販賣店。

雖然依家落快餐店通常都用啲自助點餐機，但之前都未試過幫襯呢類自助販賣店。裡面好簡單，一邊喺擺得滿滿飯盒嘅販賣機，另一邊喺放滿飲品嘅凍櫃。初時以為真喺一個人都無，原來喺有店員協助嘅。

操作好簡單，晌屏幕揀選想要嘅便當，再拍八達通就搞掂。據店員講，每日會提供5款便當（$47-$59），每星期都會轉款，以保持新鮮感，可以上官網睇睇，而且，預先晌官網訂購更有85折，到時用二維碼取貨。

落好單，就睇住部機點樣送個便當落去取貨口，都幾得意。拎上手，都飯盒都好熱吓，但就未至於熨手嗰種。

打正日本旗號，個便當外觀做得好精緻，甚具和風，而且，個便當盒摸上手應該喺啲高質素嘅環保飯盒，因為感覺好唔同。

照燒Beyond Burger野菜盛 $59

打開盒蓋，睇得出如日本人做料理嗰份細心，底面都會加多一張牛油紙，除衛生啲之外，更無咁易整濕個飯盒。飯內有大大件「未來牛肉」及大量野菜，野菜嘅味道唔錯喎，而「牛肉」真喺食落幾似，幾可亂真，仲伴埋件日式煎蛋同啲日式醃菜，整體味道唔錯。

BBQ風味雞拼安格斯牛 $47

一睇啲牛肉，就喺「吉野家」式和風牛肉，用上安格斯就自然質素唔差得去邊，咬落都軟軟腍腍，而且，份量十足，件雞扒燒得亦幾好惹味，話BBQ，感覺就有啲似照燒啫，總之雞肉都幾嫩；其實飯量亦唔少，食完一個都真喺夠晒飽嘅。

未知喺咪健康緣故，兩個便檔落汁都唔多，鍾意撈汁嘅人可能嫌少，講健康嘅人就覺得幾啱。金鐘放飯時段好多人，而且，就算快餐店都唔平，「和田」就提供多一個選擇俾附近嘅上班族。

個人評分
味道： 8/10
環境： 7/10
服務： 7/10
抵食： 8/10
平均每人消費：HK$55

餐廳資料：
和田便當 Wada Bento
金鐘夏愨道18號海富中心2樓87號舖